Komuna e Drenasit njofton se Grupi Punues për hartimin e Strategjisë për Zhvillimin dhe Fuqizimin e Rinisë në Komunën e Drenasit ka mbajtur disa takime radhazi për hartimin e strategjisë që përcakton objektivat dhe veprimet për fuqizimin e rinisë.
Ky projekt mbështetet nga Departamenti i Shtetit të Shteteve të Bashkuara të Amerikës përmes Ambasades Amerikane dhe administrohet nga KUSA.
“Grupi i cili mbështetet nga konsulenti z. Qendrim Hoxha drejtor i Leadership Development Association (LDA) Ballkan- Dega në Kosovë, përbëhet nga anëtarë nga ekzekutivi komunal, zyrtar nga DKRS-së, Këshilli i Veprimit Rinor Lokal, Këshilli i Prindërve, Këshilli i Nxënësve dhe organizata të tjera, ka punuar në identifikimin e nevojave të të rinjve, dhe përcaktimin e objektivave për realizimin e këtyre nevojave”, thuhet në njoftim.
Sipas njoftimit përveç takimeve në kuadër të draftimit të strategjisë, janë mbajtur takime konsulative edhe me të rinjtë në kuadër të trajnimeve “Youth Acaddmy”.
Hartimi i Strategjisë për Zhvillimin dhe Fuqizimin e Rinisë 2024-2029 është pjesë e projektit ”Angazhimi i të Rinjve, një Zë për Ndikim” që financohet nga Departamenti i Shtetit i Shteteve të Bashkuara të Amerikës përmes programit “Alumni Engagement Innovation Fund 2023”, mbështetur nga Ambasada e ShBA-ve në Kosovë, administruar nga KUSA me dy anëtarët Laureta Thaqi dhe Xhemile Shabani-Murati, në partneritet me Organizatën Qendra për Avokim dhe Angazhim Qytetarë AdVOICE. /Kosovatimes/
