Në Tiranë avokati Sokol Mëngjesi, 45 vjeç, i cili është dhe një ndër mbrojtësit ligjorë të ish kryeministrit Sali Berisha, u dhunua nga në orët e para të ditës së sotme nga tre persona në zonën e njohur si ish Blloku, në qendër të kryeqytetit. Gjendja e tij shëndetësore u përkeqësua pasdite, ndërsa policia njoftoi se kishte identifikuar autorët, njëri prej të cilëve u vetdorëzua në mbrëmje. Sipas policisë, sulmi ndaj tij, kishte ndodhur për shkak të një procesi gjyqësor, ku ai përfaqësonte familjet e disa prej agresorëve.
Avokat Mëngjesi sapo kishte lënë fëmijën në kopsht, kur është ndalur nga dhunuesit, me të cilët mësohet se fillimisht ka debatuar, ndërsa më pas ata e kanë goditur. Njëri prej agresorëve mësohet ta ketë qëlluar disa herë pas koke. Avokati ka rënë nga forca e goditjeve dhe ka shembur më pas kokën në trotuar, duke mbetur pa ndjenja.
Ai është dërguar në Spitalin e Traumës, ku janë konstatuar endema në kokë dhe fraktura. Fillimisht gjendja e tij ka qenë e stabilizuar, por ajo u përkeqësua në orët e pasdites, dhe mjekët kanë aplikuar komën artificiale, ndërsa është vënë dhe në intubim.
Për orë të tëra, motivet e ngjarjes mbetën të paqarta, deri kur pasdite, policia e Tiranës, njoftoi se falë kamerave të shumta në zonë, kishte identifikuar autorët dhe zbardhur shkakun e sulmit të egër. Ajo shpjegoi se përveç tre personave që e kishin sulmuar avokatin, një i katërt i kishte ndihmuar të largoheshin me një automjet. Për kapjen e tyre është vënë dhe një shpërblim prej 20 mijë eurosh, për këdo që jep informacione të vlefshme.
Në momentin që Drejtori i Policisë së Tiranës Tonin Vocaj, po jepte konferencën për shtyp mbi ngjarjen, u njoftua se njëri prej autorëve Dorian Alia, 32 vjeç, ishte vetëdorëzuar, ndërsa tre të tjerët Romario Tabaku 26 vjeç, Drivald Alia 21 vjeç dhe Elton Kasaj 33 vjeç, janë ende në kërkim. Policia ka ndaluar ndërkohë një të afërm të njërit prej agresorëve, i cili dyshohet të jetë organizatori i sulmit ndaj avokatit Mëngjesi.
Sipas policisë, gjithçka lidhet me një proces gjyqësor, për pronat e një familjeje në Tiranë, e cila ishte përfaqësuar në gjykatë nga studio ligjore e avokatit Mëngjesi. Ndonëse gjyqi ishte fituar në dy shkallët e para të gjyqësorit, një pjesë e familjarëve kishte kundërshtuar tarifat e shërbimit të studios avokatore. Sipas policisë agresorët, të cilët kanë lidhje gjaku e krushqie me njëri tjetrin, i përkisnin këtij grupi që nuk ishte pajtuar të paguante studion e avokatisë për shërbimin e dhënë.
Dhoma e Avokatisë reagoi per ngjarjen duke deklaruar ndër të tjera se “kërcënimi i avokatëve, jo vetëm cenon rëndë misionin e avokatit në ushtrim të profesionit të tij, por krijon situata të vështira që duhet të vlerësohen maksimalisht”.
Avokat Mëngjesi, mban titullin Profesor dhe është pedagog pranë Fakultetit të Drejtësisë. Universiteti i Tiranës, duke dënuar sulmin ndaj tij, shprehet në një deklaratë se pret dhe beson “që policia dhe prokuroria të zbardhi sa më shpejt autorët dhe motivet e këtij sulmi kriminal dhe të rrezikshëm”.
Ndërsa motivet nuk ishin zbardhur ende, ngjarja nuk i shpëtoi gjatë ditës ngjyrimeve politike. Zëdhënësja e grupit të Rithemelimit, Floriana Garo reagoi me tone të ashpra duke drejtuar gishtin e përgjegjësisë ndaj kryeministrit Edi Rama.
“Ky është një akt kriminal dhe hakmarrje e verbër, primitive e Edi Ramës ndaj profesor Sokol Mëngjesit, sepse ai së bashku me kolegët e tij, faktuan para shqiptarëve me prova dhe dokumente zyrtare të pakundërshtueshme, se procesi gjyqësor kundër kryetarit të Partisë Demokratike është një proces kryekëput politik i bazuar ne një piramidë mashtrimi, siç është çështja e Klubit Sportiv Partizani”, u shpreh ajo në një deklaratë.
Menjëherë më pas erdhi reagimi i ministrit të Brendshëm Taulant Balla, i cili ndërsa thotë se është interesuar personalisht për rastin e avokatit, si pranë kolegëve të tij ashtu dhe pranë mjekëve të spitalit, foli për “gënjeshtra” të nxitura nga ish kryeministri Berisha, i cili ndodhet në arrest shtëpie.
“Shpreh keqardhjen që nga kati i 8 hidhet edhe në këtë rast një kazan me helm për publikun, me qëllimi vetëviktimizimin politik të një të korruptuari madhor”, shkruajti zoti Balla në një postim në Facebook.
