Këshilltari i presidentes Vjosa Osmani, Bekim Kupina, i ka reaguar këshilltarit të Behxhet Pacillit, Jetlir Zyberajt i cili ka shkruar se qeveria e saj dhe e Kurtit ka negociuar që terroristët e Banjskës të largohen pa një “therë në këmbë”.
Këshilltari Kupina ka thënë presidentja Osmani nuk ka negociuar asnjëherë dhe asgjë në dëm të Kosovës e aq më pak lirimin e terroristëve dhe paramilitarëve serb.
“Jetlir Zyberaj Presidentja nuk ka negociuar asnjëherë dhe asgjë në dëm të Kosovës e aq më pak lirimin e terroristëve dhe paramilitarëve serb, të cilët kanë kryer akt agresioni ndaj Republikës sonë dhe e kanë vra heroin Afrim Bunjaku. Shpërndarja e propagandës serbe (specialitet i Jetlirit dhe shefit të tij), rrezikon interesat e shtetit tonë dhe sigurinë kombëtare, rrezikon jetën e policëve të tjerë, të cilët çdo ditë po mbrojnë kufijtë e Kosovës si dhe tenton ta njollosë sakrificën sublime të heroit të Kosovës Afrim Bunjaku”, ka shkruar Kupina në Facebook.
Kupina ka paralajmëruar se Osmani do të ndërmarrë veprime ligjore ndaj Zyberajt për atë që ka shkruar në Facebook.
“Përtej qëllimit të ulët e propagandistik, një deklaratë e tillë përbën shpifje të rëndë dhe nxitje të urrejtjes për të cilën Presidentja do të ndërmarrë veprime sipas ligjit”, ka thënë ai. /Kosovatimes/
