Në Palestrën e Sporteve “Sezai Surroi”, është mbajtur turneu tradicional në pingpong për nder të Lidhjes së Prizrenit. Morën pjesë mbi 50 pingpongistë nga Kosova dhe Shqipëria. Gara u zhvillua në një atmosferë të mirë sportive, në ambientet e bukura të Palestrës së rinovuar.
Turneun e nderoi, me vizitën e tij, Adem Morina, drejtor i DKRS të Komunës së Prizrenit, i cili përshëndeti sportistët dhe Kpp Lidhja e Prizrenit, që është organizator i kësaj ngjarjeje të rëndësishme sportive. Ai, shprehu entuziazmin e tij për këtë aktivitet dhe shprehu gatishmërinë e tij për mbështetjen e pingpongut në të ardhmen, në Prizren.
Gara e sotme, ishte më pak masovike, por kishte cilësi të mjaftueshme, pasi në të morën pjesë lojtarët më të mirë aktualisht te ne si dhe pati pjesëmarrës edhe nga Shqipëria. Dy të parët nga secili grup, nga faza e grupeve, kaluan më tej për ta kompletuar shortin kryesor me eliminime direkte. Ndeshjet me eliminime dhanë momente interesante edhe në fazat e më hershme, siç ishte rasti i dy dueleve ndërmjet lojtarëve të huaj te Kpp Priping Mahmud Sallama dhe Sina Keyhan dhe Rrahman Ademajt e Murat Kurtulush nga Kpp Dardania Paysera. Këto dy duele na dhanë shumë momente atraktive që lojtarët shfaqën nga repertori i tyre i larmishëm. Fitore shënuan lojtarët e Priping, duke paralajmëruar pretendimet e tyre për finale. Megjithatë, kjo nuk ndodhi, pasi sot, më të disponuar ishin lojtarët e Kpp Lidhja e Prizrenit, Fatih Karabaxhaku dhe Kreshnik Mahmuti, të cilët kompletuan finalen. Kreshniku e mundi Keyhanin, pasi ai e dorëzoi lojën, kurse Fatihu me lojë shumë të pjekur arriti që ta mund egjiptianin Sallama 3:1 në seta dhe ti revanshohet për humbjen e pësuar para dy javësh në turneun Ahmet Hoxha. Dueli ndaj Sallamas, sikur e shteroi shumë Fatihun andaj në finale Kreshniku pati më shumë freski, dhe fitoi pa shumë mund me 3:0, në seta.
Për më të mirët organizatori ndau shpërblimet me medalje dhe kupa, si dhe shuma modeste në të holla.
Gara e radhës do të jetë në fundjavën që vjen, kur do të mbahet turneu ndërkombëtar PRISHTINA OPEN 2024.
RENDITJA
1.KRESHNIK MAHMUTI
2.FATIH KARABAXHAKU
3.SINA KEYHAN
4.MAHMOUD SALAMA. /Kosovatimes/
