Ka filluar dëshminë e tij, Nuhi Bytyçi, si dëshmitar i 71-të i Zyrës së Prokurorit të Specializuar në procesin gjyqësor ndaj ish-krerëve të Ushtrisë Çlirimtare të Kosovës.
“Dëshmitari ka qenë gazetar i cili ka mbuluar UÇK-në gjatë luftës. Ai ka bërë fotografi të elementeve ose momenteve të rëndësishme përfshirë edhe rolin në të cilin janë përfshirë të akuzuarit. Dëshmitari ka shkruar një libër rreth përvojës së tij të botuar në vitin 2019 që quhet “Libri i Luftës”, ka thënë prokurori Matt Halling i cili ka filluar pyetjet në drejtim të Bytyçit.
Dëshmitari Bytyçi ka pohuar se është autori i një libri të titulluar “Libri i Luftës”, në të cilin pasqyrohen përjetimet e tij gjatë kohës së luftës në Kosovë. Sipas kryetarit të trupit gjykues, Charles Smith dëshmia e këtij dëshmitari pritet të zgjasë rreth dy ditë, përkatësisht 11 orë.
Ai ka thënë se ZPS-ja ka paraparë 3 deri në 4 orë për pyetje, ndërsa mbrojtja e të akuzuarve rreth 7 orë e gjysmë për kundërpyetje.
Deklaratat e dëshmitarit që rrjedhin nga seanca përgatitore me ZPS-në, u pranuan si prova materiale. Gjithashtu me vendim të trupit gjykues, u pranuan të gjitha faqet e përkthyera të librit “Libri i Luftës”.
