Menaxhmenti i QKMF- së, dhe përfaqësuesit e Drejtorisë së Shëndetësisë në Komunën e Drenasit, në krye me drejtoreshën Lumnije Gjoshi- Krapi pritën në takim përfaqësuesit e Ambasadës Zvicerane SDC, përfaqësuesit AQH, përfaqësuesit e IHS, me të cilët diskutuan rreth mundësisë se bashkëpunimit dhe shkëmbimit të informacionit në fushën e shëndetit publik dhe mjekësisë familjare mes institucioneve tona dhe përfaqësuesve të Ambasadës Zvicerane.
Sipas njoftimit të Komunës së Drenasit në fokus të bisedës ishte themelimi i Këshillit të Pacientëve dhe roli i tij në përmirësimin e shërbimeve mjekësore dhe sigurisë së pacientëve si dhe rëndësia e krijimit të një platforme ku pacientët mund të shprehin nevojat, shqetësimet dhe sugjerimet e tyre në lidhje me shërbimet shëndetësore.
Tutje gjatë bisedës, u theksua se një këshill i pacientëve i organizuar dhe i përfshirë mund të kontribuojë në përmbushjen e synimeve si: rritja e përgjegjshmërisë ndaj pacientëve, përmirësimi i komunikimit mjek-pacient, si dhe identifikimi dhe adresimi i çështjeve të rëndësishme të cilat mund të ndikojnë në cilësinë e shërbimeve shëndetësore.
Drejtoria për Shëndetësisë dhe Mirëqenie Sociale shpreh falënderimin për mbështetjen e vazhdueshme të Ambasadës Zvicerane SDC dhe AQH për përmirësimin e sistemit shëndetësor dhe ofrimin e shërbimeve mjekësore më cilësore për qytetarët tanë. /Kosovatimes/
