Drejtoria për Shëndetësi në Komunën e Mitrovicës njofton se sot përfunduan me sukses ligjëratat dhe sesionet informuese, në kuadër të fushatës vetëdijesuese “Java e edukimit shëndetësor kundër konsumimit të duhanit”, ku në fokus ishin nxënësit e klasave të VII-ta dhe të IX -ta të shkollave fillore dhe të mesme të ulëta.
Sipas njoftimit nga data 30 Maj deri më sot 05 Qershor 2024, Njësia për Edukim Shëndetësor, Këshillim dhe Promovim të Shëndetit e QKMF-së, mbështetur nga Drejtoria për Shëndetësi, ka mbajtur ligjërata edukative dhe sesione informuese rreth dëmeve ndaj shëndetit, që shkaktohen nga konsumimi i duhanit, në shkollat fillore dhe të mesme të ulëta në Komunën e Mitrovicës.
“Njësia për Edukim Shëndetësor, Këshillim dhe Promovim të Shëndetit ka zhvilluar ligjërata edukative në këto ShFMU: “Musa Hoti“, “Migjeni“, “Abdullah Shabani“, “Eqrem Çabej”, “Gj.K.Skënderbeu“, “Andon Z.Çajupi“, “Aziz Sylejmani”, “Bedri Gjinaj“, “Fazli Grajçevci” dhe “Harun Beka”.
Dy ligjërata janë mbajtur dhe nga profesionistët shëndetësorë të QMF në Shupkofc dhe QMF Tunel i Parë, në shkollat: ShFMU “Shemsi Ahmeti” në Shupkofc nga Dr.Mevlyde Smakiqi dhe ShFMU “Elena Gjika” nga Dr.Gylxhane Bekteshi”, thuhet në njoftim.
Drejtori i Drejtorisë për Shëndetësi, Dr. Fahri Shabani, vlerësoi lart rëndësinë e organizimit të këtyre aktiviteteve dhe falënderoi të gjithë profesionistët shëndetësorë që u angazhuan që “JAVA E EDUKIMIT SHËNDETËSOR KUNDËR DUHANIT” të përmbyllet me sukses.
Kjo fushatë vetëdijesuese është organizuar në kuadër të shënimit të 31 Majit – Ditës Botërore pa duhan. /Kosovatimes/
