Të martën, në Klubin e Shtypit në Bruksel, Ambasada e Republikës së Kosovës organizoi prezantimin e përkthimeve në gjuhën angleze dhe atë holandeze të librit “Një fijë shprese, një fije shkrepëse”, të shkrimtarit të njohur kosovar, Ag Apolloni.
Në prezencë të një numri të ambasadorëve, diplomatëve, zyrtarëve dhe medias evropiane, shefi i Misionit në Ambasadën e Republikës së Kosovës në Bruksel, ambasadori Agron Bajrami, hapi mbrëmjen duke prezantuar autorin Ag Apolloni, dhe veprën e tij, romanin dokumentar që në anglishte është botuar nga shtëpia botuese “Elbow Books”, nën titullin “Glimmer of Hope, Glimmer of Flame”, ndërsa në holandishte nga shtëpia botuese “Skenderbeg Books”, nën titullin “Een sprankje hoop, een lont”.
Ai njoftoi se edhe përkthimi në gjuhën franceze është gati, dhe së shpejti do të botohet.
Vet autori Apolloni më pas lexoi fragmente nga libri, të pasuara nga një bashkëbisedim me të pranishmit, gjatë të cilit shkrimtari rrëfeu për vështirësitë dhe procesin e hulumtimit dhe shkrimit të një libri të tillë, që trajton një histori të rëndë vuajtjeje dhe viktimizimi të shqiptarëve të Kosovës, nga forcat policore e ushtarake të Serbisë.
“Audienca në prezantim, mes të cilës ishin një ambasadorë e diplomatë nga disa shtete, përfshirë SHBA-në, Turqinë, Estoninë, Kroacinë, Maqedoninë veriore dhe Malin e Zi, si dhe zyrtarë, hulumtues e media belge dhe evropiane, shprehu interesim të madh për rrëfimin që trajton libri, përkatësisht rrëfimin e trishtë të Ferdonije Qerkezit, nënës që në luftë humbi katërdjemtë dhe bashkëshortin, dhe atë të Pashke Markajt, nënës e cila pasi u zbardh fati tragjik i dy djemve të saj dhe i varrosi ata, dogji veten” thuhet në njoftimin e ambasadës.
Komentet dhe bashkëbisedimi pasues u orientuan nga e vërteta tragjike e luftës në Kosovë, dhe relacioni i sotëm me atë të kaluar të para 25 viteve.
Në kuadër të prezantimit, në fund të bisedës, Ambasada e Republikës së Kosovës u shpërndau diplomatëve të pranishëm kopje të librit në anglishte dhe holandishte, ndërsa autori nënshkroi dedikimet për shumicën audiencës, e cila mbeti tejet e interesuar për dokumentimin e tillë të historisë së Kosovës përmes letërsisë.
