Gjyqtari i procedurës së rastit të ish-krerëve të UÇK-së në Dhomat e Specializuara në Hagë, Nicolas Guillou ka dhënë dorëheqje. Francezi vendimin ia ka dorëzuar presidentes së këtij institucioni të përkohshëm, Ekaterina Trendafilova.
Ndërsa Autoriteti Emërues, gjeneralmajor Xhovani Pietro Barbano (Giovanni Pietro Barbano) emëroi gjykatësen Marjorie Masselot (Francë) në Regjistrin e Gjykatësve Ndërkombëtarë (Regjistri) në përputhje me nenin 28(4) të Ligjit për Dhomat e Specializuara dhe Zyrën e Prokurorit të Specializuar. Më të njëjtën ditë, gjykatësja Masselot bëri betimin solemn.
“Kryetarja e Dhomave të Specializuara të Kosovës (DHSK), gjykatësja Ekaterina Trendafilova, e uroi përzemërsisht gjykatësen Masselot dhe deklaroi se pret me kënaqësi bashkëpunimin me të në DHSK”, thuhet në njoftimin e DHSK-së.
Biografia e gjykatëses Masselot gjendet në faqen e internetit në DHSK.
“Emërimi i gjykatëses Masselot pason dorëheqjen nga Regjistri i Gjykatësve Ndërkombëtarë të gjykatësit Nicolas Guillou i cili është zgjedhur gjykatës në Gjykatën Penale Ndërkombëtare”, thuhet në këtë njoftim. /Kosovatimes/
