Gjenerali komandues i trupave të para britanike, që hynë në Kosovë në vitin 1999, Paul Gibson pas 25 vitesh u kthye në Prishtinë, në zyrën e tij, ku punoi atëkohë.
Me të hyrë në zyrë ai u shpreh shumë i emocionuar. Aty u prit nga komisionerja për Informim dhe Privatësi, Krenare Sogojeva e cila aktualisht punon në këtë zyrë.
Gibson vizitoi edhe oborrin e objektit ku kishte qëndruar bashkë me 120 ushtarë, e ku sot gjendet Agjencia për Informim dhe Privatësi. Ai në një bisedë ekskluzive për televizionin publik, tregon se si e gjeti Prishtinën më 13 qershor 1999.
“25 vjet më parë, 13 qershor 1999. Ne arritëm me helikopter rreth orës katër pasdite dhe kam udhëhequr batalionin nëpër rrugët e Prishtinës për herë të parë. Në atë kohë ishte një periudhë shumë emocionuese. Shumë fëmijë të vegjël dhe nëna dolën në rrugë. Kishin lule dhe donin të përqafonin ushtarët. Ushtarët e mi ishin përgatitur për luftë. Pra, ne po përpiqeshim të ishim profesionistë dhe në të njëjtën kohë, kishte një kakofoni zhurme dhe emocioni, ndjenja në ajër nga njerëzit që ishin kaq të kënaqur të na shihnin, kështu që ishte një kohë shumë, shumë emocionuese. Por unë duhej të lija mënjanë emocionet sepse kisha punë për të bërë”, tha Paul Gibson, gjeneral komandues i trupave të para britanike.
Ish gjenerali britanik thotë se sot është e jashtëzakonshme ta shohësh kryeqytetin që ka ndryshuar shumë.
“Është e jashtëzakonshme të shohësh përparimin e Prishtinës. Ajo që pashë në vitin 1999 dhe ajo që shoh sot është jashtëzakonisht ndryshe. Ka një zhvillim të madh. Banesa të larta, qendra tregtare, të gjitha të tjerat, hotele, kështu që është shumë më e gjallë. Ka shumë kafene dhe restorante. Dhe ajo që ndjej është një ndjenjë e vërtetë entuziazmi dhe optimizmi e një popullate shumë të re këtu që flet anglisht jashtëzakonisht mirë. Kështu që unë mund të shoh se e ardhmja është shumë e ndritshme. Përulem kur e di që ajo që bëmë unë dhe ushtarët e mi, në fillim të qershorit 1999 luajti një rol të vogël në atë rrugëtim që Kosova dhe u bë komb i pavarur në vitin 2008. Dhe tani ja ku jemi 25 vjet pas, në një kryeqytet të mirëfilltë evropian , i lulëzuar. Dhe me një të ardhme të madhe përpara”, tha tutje Gibson.
Ish-gjenerali i Britanisë së Madhe foli edhe për marrëdhëniet Kosovë-Serbi për çka tha se paqja ndërfqinjësore i hapë rrugë integrimit të Kosovës në BE.
“Ju duhet të dini historinë tuaj. Ju duhet të kuptoni se çfarë ka ndodhur më parë, sepse atëherë mund të kuptoni drejtimin e udhëtimit. Por unë me të vërtetë do t’i nxisja të gjitha palët që të mblidhen rreth një tavoline bisedash dhe të përpiqen t’i zgjidhin këto çështje. Në një mënyrë paqësore, pragmatike dhe të ndjeshme”, shtoi ai.
Për të respektuar kontributin e gjeneralit britanik në çlirimin e Prishtinës, Paul Gibson, tash e tutje zyra ku kishte punuar gjenerali, do të mbajë emrin e tij.
