Kryeministri Albin Kurti në përurimin e Klinikës së Gjinekologjisë ka thënë se ky investim përfshin koston prej 5.5 milionë eurosh.
“Ky është një investim i jashtëzakonshëm, që e ka transformuar rrënjësisht këtë klinikë. Bëhet fjalë për 5.5 milionë euro përafërsisht, që janë investuar këtu me ç’rast mbi 3 milionë euro janë për fertilizimin e asistuar mjekësor, ndërkaq rreth 2.4 milionë euro janë për mjekësinë fetale dhe amniocentezën”
Kurti ka potencuar që shuma për fertilizimin e asistuar mjekësor do të ndahet në investim në infrastrukturë dhe për paisje. Ai ka përmendur edhe shtesat për lehona.
“Mbi 55 mijë lehona marrin mbështetje financiare dhe mbi 40 mijë fëmijë marrin shtesa”, ka thënë ai.
“Në këto reparte janë instaluar edhe njësitë e tjera të cilat do të ndihmojnë në sistemin informativ shëndetësor, do të ketë digjitalizim të rradhëve, procese të digjitalizuara dhe përveç kushteve të jashtëzakonshme që gratë do t’i kenë në këtë klinikë, edhe punëtorët do ta kenë më të lehtë ta bëjnë punën e tyre”, ka thënë ministri i Shëndetësisë, Arben Vitia.
