Festivali Ndërkombëtar i Operas – Ramë Lahaj, edicioni i katërt, do të mbahet mes datave 21 korrik dhe 2 gusht. Festivali do të hapet me mbrëmjen ‘Nexhmije Pagarusha’, dedikuar muzikës shqipe dhe do të përmbyllet me gala mbrëmjen ‘Ramë Lahaj & Friends’.
Sipas njoftimit nga RLIOF, ky edicion përfshin ekspozitë, masterklasë dhe pesë mbrëmje muzikore.
“Ekspozita – Galeria e Fakultetit të Arteve, 21 korrik, mbrëmja ‘Nexhmije Pagarusha’ – Sheshi ‘Zahir Pajaziti’, 22 korrik, masterklasë – Amfiteatri i Bibliotekës Universitare, 23-27 korrik, Opera Night – Amfiteatri i Bibliotekës Universitare, 24 korrik, Ensemble Evening – Sheshi ‘Zahir Pajaziti’, 26 korrik, New Generation – Amfiteatri i Bibliotekës Universitare, 28 korrik, Gala Mbrëmja ‘Ramë Lahaj & Friends’ me Orkestrën e Operës së Kosovës – Sheshi ‘Skënderbeu’, 2 gusht”, thuhet në komunikatën për medie të RLIOF.
Më tutje në njoftim thuhet se edicioni i katërt i Festivalit Ndërkombëtar të Operës – Ramë Lahaj do të bashkojë zëra nga e gjithë bota për ta nderuar trashëgiminë muzikore të bartur ndër breza. Frymëzuar nga kujtimet e tenorit Ramë Lahaj, i rritur me këngët e njohura të muzikës shqipe, të cilat i këndonte me urimin e nënës ‘T’knoft zemra’, këtë vit festivali RLIOF bën ndërlidhjen e trashëgimisë muzikore dhe rrëfimeve personale të artistëve me gjuhën universale të operës.
Festivali shfrytëzon fuqinë e zërave operistikë si jehonë për vlerat e familjes, dashurinë për artin e mirëfilltë muzikor dhe rolin e figurës së nënës në formësimin e identitetit artistik. Nëpërmjet performancave që burojnë nga thellësia e zemrës, kujtimeve dhe eksperiencave diverse, do t’i rijetojmë në formën e artit operistik, këngët e nënës që vazhdojnë të rezonojnë në zemrat tona duke u dhënë formë personaliteteve artistike dhe duke shërbyer si inspirim i pashtershëm për shpirtin tonë.
“Me temën ‘T’knoft zemra’, RLIOF festivali synon ta frymëzojë dashurinë për të kaluarën, ta pasurojë të tashmen dhe t’i inspirojë gjeneratat e reja të këndojnë me zemër e të marrin rrugë drejt skenave prestigjioze të operës”, thuhet tutje në komunikatë.
