Të paktën 29 persona kanë vdekur dhe më shumë se 100 janë shtruar në spital në shtetin jugor indian të Tamil Nadu pasi kishin pirë pije alkoolike të prodhuara ilegalisht, thanë zyrtarët sot për mediat lokale.
Zyrtarët i thanë agjencisë së lajmeve Press Trust of India se disa nga të shtruarit në spital ishin në gjendje kritike dhe se numri i të vdekurve mund të rritet. Një ekip ambulance, mjekë dhe specialistë nga zonat e afërta u përfshinë në ofrimin e ndihmës, raportoi AP.
Zyrtarët njoftuan se janë arrestuar persona të përfshirë në prodhimin e paligjshëm të pijeve alkoolike. Vdekjet nga alkooli i prodhuar ilegalisht janë të zakonshme në Indi, ku të varfërit nuk mund të përballojnë markat e licencuara nga dyqanet shtetërore. Prodhimi i paligjshëm i pijeve alkoolike është kthyer në një industri jashtëzakonisht fitimprurëse për shkak të mospagimit të taksave dhe shitjeve jashtëzakonisht të larta me çmim të ulët.
Më shumë se 30 njerëz vdiqën në vitin 2022 në shtetin lindor indian të Biharit pasi kishin pirë pije alkoolike të prodhuara ilegalisht. Më herët atë vit, të paktën 28 njerëz vdiqën në shtetin indian të Gujarat, dhe në vitin 2020, të paktën 120 njerëz vdiqën në shtetin indian të Punjab, gjithashtu për shkak të konsumit të pijeve të paligjshme.
