Kreu i LDK-së, Lumir Abdixhiku, i ka shprehur ngushëllime familjes Maloku për largimin nga kjo botë të zonjës Havë, bashkëshortes së Enver Malokut.
Abdixhiku tha se e ndjera ishte një grua e fortë të cilës barra e orëve të rënda, i kishte përcaktuar fatin e gjetjes së forcës përtej humbjes së madhe. Dhe këtë forcë e kishte gjetur mu siç dinte ajo, duke qenë e dashur, e buzëqeshur – duke qenë një zonjë e rëndë!
“Hava Maloku na la sonte. Me të u shua dhe një copëz e historisë së takimeve për çdo 11 janar. Ishte përplot dritë e mirësi. Këtë vit, kishte gjetur forcën të ngrihej nga shtrati i fundit i saj, për të shpalosur bashkë me ne pllakën e portretin përkujtimor të Enverit, bashkëshortit të vrarë në 11 janarin e vitit të lirisë. E dinim, të gjithë, se ky duhej të ishte takimi ynë i fundit. E sado që ishte vështirë, e dinim të gjithë, ne dhe ajo, se ky duhej të ishte kujtimi e kuptimi i fundit nga kjo shtëpi e demokracisë. Pimë kafen bashkë, e përcollëm bashkë. Na la me përplot buzëqeshje. Siç bënte përherë!”, ka shkruar Abdixhiku.
Me këtë rast ai në emër të të gjithë anëtarësisë së Lidhjes Demokratike të Kosovës, i ka shprehur ngushëllime vajzës së saj Doruntina dhe djemve Drinit e Leonit për humbjen e nënës së tyre.
“Bëhuni të fortë, siç u bë ajo kur kishit nevojë për të! Zonja Havë, bashkohu në parajsën e pasosur me Enverin që aq shumë e deshe e të mungoi!”, ka shkruar Abdixhiku. /Kosovatimes/
