Komisionit ad-hoc për përzgjedhjen e kandidatëve për një anëtar të Bordit të RTK-së, pas konstituimit ka shqyrtuar listën e kandidatëve të propozuar për anëtarë të Bordit të RTK-së. Me shumicë votash, katër kandidatë u vendosë që të thirren për intervistim, ku dy prej tyre do të shkojnë në seancë për votim.
Kryetarja e këtij komisioni, Adelina Grainca, ka theksuar se kanë pranuar aplikacionet e 5 kandidatëve nga radhët e komunitetit shqiptarë për anëtar të bordit të RTK-së. Sipas saj, nga 5 kandidatët një kandidate nuk i ka plotësuar kushtet e kërkuara në konkurs.
“Aplikacionet e kandidatëve janë proceduar në formë të rregullt nga RTK për në Kuvend. Kuvendi ka pranuar aplikacionet e 5 kandidatë nga radhët e komunitetit shqiptarë për anëtar të bordit të RTK-së. Ne si komision nga 5 kandidat duhet të përzgjedhim dy kandidat për seancë plenare. Kandidatët Besa Maxhuni, Ilir Bytyqi, Bul Salihu dhe Fatime Buzolli i kanë plotësuar kushtet, ndërsa Vlera Kastrati nuk i ka plotësuar kushtet sepse nuk i sjellë dëshmitë e kualifikimeve dhe dëshmitë që nuk është nën hetime”, ka thënë ajo.
Deputeti i LDK Agim Veliu, ka thënë se kandidati i cili nuk ka plotësuar kushte nuk duhet që t’i jepet kohë shtesë pasi ka pasur kohë të mjaftueshme për të dorëzuar dokumentet.
Me propozimin e Veliut u pajtuan edhe një pjesë e anëtarëve të mazhorancës. Ndryshe u shpreh deputeti i LVV-së, Besim Muzaqi, i cili ka theksuar se kandidates që nuk ka plotësuar kushtet duhet t’i jepet kohë shtesë.
Por, me shumicë votash komisioni vendosi që kandidati i cili nuk plotësoi kushtet të mos ftohet për procesin e intervistimit.
Gjithashtu u vendos që me 25 qershor të mbahet mbledhja ku do të intervistohen kandidatët, të cilët do të intervistohen rreth 20 minuta.
