Policia gjermane arrestoi dy persona të akuzuar për shantazh ndaj Michael Schumacher, raportoi gjermanisht Bild.
Dy burra nga qyteti i Wuppertalit, në perëndim të Gjermanisë, janë arrestuar të mërkurën, më 19 qershor, ndërsa kanë kërkuar disa milionë euro nga familjarët e shoferit. Kushtet e sakta të këtij shantazhi nuk dihen, por informacioni është konfirmuar për agjencinë e lajmeve Reuters.
Wolf-Tilman Baumert, një zëdhënës i zyrës së prokurorit publik zbuloi se prokurorët në Wuppertal kanë hapur një hetim për shantazhin e personazheve të famshëm dhe se janë bërë arrestime si pjesë e këtij hetimi. Ata nuk kanë dashur të japin identitetin e personit të shantazhuar, por sipas Bild bëhet fjalë për Michael Schumacher.
Kjo nuk është hera e parë që familja e Michael shantazhohet. Shtatë vjet më parë, një burrë u dënua pasi kërkoi 900 mijë euro në një e-mail dërguar familjes së tij. Përveç shqetësimit për shëndetin e ish-pilotit të Ferrarit, familja e Michael duhet të përballet me shumë presione të jashtme.
Familja Schumacher ka gjithnjë e më shumë probleme. Edhe pse kampioni ka grumbulluar një pasuri të madhe gjatë viteve të tij pas timonit të një makine F1, shpenzimet e tij mjekësore kanë kaluar 70 milionë euro që nga aksidenti, zbuloi gazeta Corriere Dello Sport në fund të majit.
Trajtimi i tij kërkon pajisje të specializuara mjekësore dhe kujdes profesional. Prandaj gruaja e Michael u detyrua të shiste pasuri të paluajtshme, një avion privat dhe një pjesë të koleksionit të orëve luksoze të Schumi. Këto shitje janë diskrete, ashtu si jeta e familjarëve që nga viti 2013 dhe aksidenti që ndryshoi jetën e tyre.
