Gjeorgjia e ka befasuar Çekinë, duke ia rrëmbyer një pikë, në kuadër të xhiros së dytë në Grupin F. Ndeshja e zhvilluar në Hamburg u mbyll baras 1:1.
Çekët e gjetën të parët rrugën e golit, në minutën e 23-të përmes Adam Hlozek, por goli u anulua me ndërhyrjen e VAR-it për shkak të prekjes së topit me dorë.
Ndërkohë, pikërisht me ndihmën e VAR-it gjeorgjianët fituan penallti në minutat shtesë të pjesës së parë, kur njëri nga lojtarët çek luajti me dorë. I saktë nga pika e bardhë ishte Georges Mikautadze.
Në pjesën e dytë çekët u rikthyen me energji shtesë dhe ishin këmbëngulës për të barazuar shifrat. E këtij qëllimi ia arritën në minutën e 59-të kur Patrik Schick shënoi nga afërsia.
Në vazhdim të ndeshjes të dyja skuadrat u përpoqën të gjejnë golin e fitores, por nuk ishin efikase para portave respektive, teksa rastin më të mirë e lëshuan gjeorgjianët në sekondat e fundit. Kësisoj, Gjeorgjia dhe Çekia arkëtuan pikën e parë në këtë Evropian.
