Forcat ushtarake ruse kryen një sulm të ri masiv ndaj infrastrukturës energjetike në Ukrainën perëndimore dhe jugore mbrëmë, njoftoi Ministria e Energjisë e Ukrainës.
“Objektet e operatorit ukrainas Ukrenergo u dëmtuan në rajonet e Zaporizhzhia në jug të vendit dhe në Lviv në perëndim”, njoftoi ministria, duke shtuar se dy punonjës u plagosën në sulmet. Të dy u shtruan më pas në një spital në Zaporizhia.
Ministria kujton se ky është sulmi i tetë i madh në termocentralet e Ukrainës në tre muajt e fundit, i cili shpesh ka rezultuar me ndërprerje të energjisë. Në njoftim thuhet se rrjeti energjetik i Ukrainës po lufton për t’i bërë ballë sulmeve të shënjestruara ushtarake ruse.
“Infrastruktura energjetike e dëmtuar ndjeshëm”
Autoritetet ukrainase njoftuan se në një sulm të madh rus gjatë natës të enjten, infrastruktura energjetike, përfshirë termocentralin, u dëmtua ndjeshëm dhe shtatë punonjës u plagosën.
Volodymyr Zelensky tha se ai beson se gjysma e kapacitetit energjetik të Ukrainës është shkatërruar nga sulmet e intensifikuara ruse deri më tani. Sot në mëngjes ai bëri thirrje që “panelet diellore dhe njësitë e ruajtjes së energjisë të instalohen në çdo shkollë dhe spital sa më shpejt të jetë e mundur”.
Drejtori i përgjithshëm i operatorit DTEK, Maksim Timchenko, paralajmëroi se nëse partnerët e saj perëndimorë nuk mobilizohen, Ukraina mund të “përballet me një krizë serioze energjitike këtë dimër”.
Prandaj, Kievi po i bën thirrje Perëndimit që ta ndihmojë atë të rindërtojë rrjetin elektrik, një projekt që kërkon investime të konsiderueshme dhe të sigurojë dërgimin e më shumë pajisjeve të mbrojtjes ajrore në Ukrainë, gjë që është e rëndësishme për t’iu kundërvënë bombardimeve ruse.
Duke marrë parasysh këtë, Uashingtoni “mori një vendim të vështirë, por të domosdoshëm” për t’i dhënë përparësi Ukrainës ndaj vendeve të tjera aleate kur bëhet fjalë për furnizimin me raketa të përdorura për mbrojtjen ajrore.
