Rreth 8,432 mysafirë të regjistruar aktualisht janë duke qëndruar në Ulqin, tha për Media Biro drejtori i Organizatës Turistike (TO) Ulqin, qazim Hoxhiq.
Sipas tij, hotelet më të mëdha në atë qytet shënojnë frekuentim të shkëlqyeshëm dhe në fillim të këtij sezoni mysafirët më të shumtë janë nga Kosova.
“Natyrisht ka mysafirë nga Serbia, të cilët janë rreth 20 për qind të numrit të përgjithshëm, 5 për qind gjermanë, 7 për qind mysafirë nga Bosnja dhe Hercegovina, 4 për qind turistë nga Polonia. Mund të themi se Ulqini ende është i dominuar nga rajoni”, tha ai.
Sipas Hoxhiqit, duke gjykuar nga të dhënat e periudhës parasezonale dhe rezultatet pozitive të shënuara në qershor, Ulqini pret një sezon të mirë turistik veror. Ai vuri në dukje se qyteti është zgjeruar shumë kohët e fundit dhe se vërehet një numër i madh i investitorëve të huaj.
“Vërehet një numër i madh i ish turistëve tanë, të cilët tani janë pronarë të patundshmërive në Komunën e Ulqinit. Si organizatë kemi zhvilluar një sërë aktivitetesh dhe eventesh. Ulqinin e kanë vizituar operatorë turistikë, shtëpi mediale si dhe agjenci nga rajoni dhe operatorë turistikë nga Gjermania”, tha ai.
“Besoj se secili nga mysafirët tanë mund të gjejë diçka interesante në Ulqin. Kohët e fundit kemi regjistruar një familje rurale dhe po punojmë intensivisht në shënjimin e shtigjeve të ecjes dhe formimin e një klubi hiking. Skena verore fillon në korrik, ashtu si dhe Oldtimer Fest. Për muajin shtator kemi planifikuar aktivitete të shumta kulturore dhe argëtuese, me synim zgjatjen e sezonit turistik veror. Janë eventet e modës, Shporta e Vjeshtës, që po e organizojmë për të tretin vit radhazi, Ditët e Bamjes, Panairi i Librit…”, tha Hoxhiq.
Ai përkujtoi se promovimi i qytetit të Ulqinit në masë të madhe i takon biznesmenëve të cilët përmes aktiviteteve që organizojnë, si sportet ujore të mbajtura në Plazhin e Madh, kontribuojnë për një ofertë më të mirë turistike.
“Gjithashtu, dua të përmend numrin në rritje të info pikave, në qytetin tonë janë 9 të tilla. Vitin e kaluar kemi lançuar aplikacionin RB 90, përmes të cilit çdo pronar mund të regjistrojë mysafirët e tij online, gjë që sigurisht e ka lehtësuar këtë procedurë. . Jemi shumë të kënaqur sepse numri i përdoruesve po rritet”, tha Hoxhiq.
