Ushtria izraelite tha se forcat e saj thyen protokollin duke lidhur një palestinez të plagosur në pjesën e përparme të automjetit të tyre gjatë një bastisjeje në qytetin Jenin të Bregut Perëndimor.
Forcat izraelite konfirmuan incidentin pasi u filmua dhe u shpërnda në mediat sociale. Deklarata e IDF tha se burri u plagos në një shkëmbim zjarri gjatë bastisjes, ku përfshihej edhe i dyshuari. Familja e të plagosurit tha se kur kanë thirrur për ndihmë emergjente, ushtarët e kanë marrë burrin, e kanë lidhur në kapuçin e xhipit të tyre dhe janë larguar.
Personi më në fund u dërgua në Gjysmëhënën e Kuqe për trajtim. IDF njoftoi se incidenti do të hetohej.
Dëshmitarët okularë që folën për agjencinë e lajmeve Reuters e identifikuan burrin si një banor lokal i quajtur Mujahed Azmi.
“Këtë mëngjes (Ob. e shtunë), gjatë operacioneve kundër-terroriste që synonin kapjen e të dyshuarve të kërkuar në zonën e Wadi Burqin, terroristët hapën zjarr ndaj ushtarëve të IDF, të cilët iu përgjigjën zjarrit,” thuhet në deklaratë.
“Gjatë shkëmbimit të zjarrit është plagosur dhe kapur njëri nga të dyshuarit”, kanë shtuar ata.
“Në kundërshtim me urdhrat dhe procedurat standarde të operimit, i dyshuari u lidh me një automjet nga ushtria. Sjellja e ushtarit të paraqitur në videon e incidentit nuk është në përputhje me vlerat e IDF. Incidenti do të hetohet dhe do të trajtohet siç duhet. “, thuhet në një deklaratë të forcave izraelite.
