Policia GJERMANE ka bllokuar 2,300 hyrje të paligjshme në vend gjatë garës së futbollit Euro 2024 në vazhdim, tha një zëdhënës i ministrisë së brendshme për gazetën Kölner Stadt-Anzeiger sot.
Ministrja e Brendshme Nancy Faeser tha në një intervistë për gazetën se më shumë se 400 urdhër-arreste ishin ekzekutuar në dy javët e fundit dhe 50 huliganë futbolli ishin penguar të hynin në vend. Gara ka nisur më 14 qershor, ndërsa finalja do të luhet më 14 korrik.
Kontrolle edhe pas përfundimit të kampionatit
“Kjo tregon se është një gjë e mirë që ne kryejmë kontrolle në kufijtë me Danimarkën, vendet e Beneluksit dhe Francën gjatë kampionatit,” tha Faeser për gazetën. Kontrollet do të vazhdojnë deri më 19 korrik, në varësi të situatës. Faeser e përshkroi operacionin si një “përpjekje të madhe” nga policia federale dhe e shtetit.
Sipas ministrisë së brendshme, 22,000 policë federalë janë vendosur për të monitoruar kufijtë, aeroportet dhe stacionet e trenave. Faeser tha se këndvështrimi i saj për turneun është jashtëzakonisht pozitiv. “Përshtypja ime është se tifozët e futbollit nga e gjithë Evropa ndihen shumë të kënaqur këtu”, tha ministri.
