Në Dhomat e Specializuara të Kosovës në Hagë, ka nisur dëshminë dëshmitari i 73-të i Zyrës së Prokurorit të Specializuar, Kurtesh Fondaj, në procesin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.
Pyetjet për këtë dëshmitar i ka filluar prokurori Matt Halling, i cili tha se ai do të flasë për mënyrën se si ka funksionuar Shtabi i Përgjithshëm i UÇK-së. Sipas kryetarit të trupit gjykues, dëshmia e këtij dëshmitari do të zgjasë rreth tri ditë.
Dëshmitari Fondaj tha se Forcat e Armatosura të Republikës së Kosovës (FARK) të cilat pretendohet se kanë qenë krah ushtarak nga Lidhja Demokratike e Kosovës (LDK) në territorin e Kosovës, nuk ka pasur në Kosovë. Ai tha se pjesa e ushtarëve që kanë qenë fillimisht nën Ministrinë e Mbrojtjes, kanë vepruar me emblemë të UÇK-së.
“FARK në territor të Kosovës nuk ka pas. Pjesa e ushtarëve që kanë qenë fillimisht nën Ministrinë e Mbrojtjes në territorin e Kosovës kanë vepruar me emblemën e UÇK-së dhe kanë qenë nën komandën shtabit të Përgjithshëm të Ushtrisë Çlirimtare të Kosovë”, tha Fondaj.
Më pas, prokurori Matt Halling kërkoi pranimin e disa dokumenteve që, sipas tij, janë sekuestruar nga Jakup Krasniqi dhe Rexhep Selimi, propozimi i cili u aprovua nga kryetari i trupit gjykues, Charles Smith.
Fondaj thotë se zyrtarisht s’është akuzuar për shpartallim të UÇK-së në zonën e Suharekës
Dëshmitari Kurtesh Fondaj gjatë dëshmisë së tij në Hagë, tha se zyrtarisht nuk është akuzuar për shpartallim të Ushtrisë Çlirimtare të Kosovës (UÇK) në zonën e Suharekës, por jozyrtarisht po, raporton “Betimi për Drejtësi”.
“Me sa di unë, zyrtarisht jo. Jo zyrtarisht po del që po. Një prej atyre dokumenteve ia kam dhënë edhe unë që është që po. Mirëpo, jo, zyrtarisht nuk kam pas vërejtje, pra në mënyrë zyrtare nuk kam pas vërejtje, por përkundrazi kam pas lëvdata”, tha dëshmitari, duke u përgjigjur në pyetjet e prokurorit Matt Halling.
“Unë nuk kam hy në UÇK ta dëmtoj atë, por përkundrazi ta jap më të mirën më të mundshme. Vetëm në rrethanat ku e përmenda realisht nuk kam vepru me nofkë, kam vepru me emër dhe mbiemër dhe kam qenë i vetëdijshëm për pasojat që mund t’i bartë në rast se dështon UÇK-ja. Unë kam besu fuqishëm në UÇK dhe jam mundu me e dhënë më të mirën e mundshme. Mirëpo, ne e kemi një shprehje ‘edhe dielli nuk nxen njësoj për të gjithë’, prandaj në kontest të saj a ka pas dikush që ka dhënë vërejtje në punën time është krejt normale. Mirëpo, misioni jem nuk ka qenë me e shkatërru atë, por me e fuqizu atë dhe me e dhënë kontributin më të mirë të mundshëm”, tha ai.
Kur u pyet për dokumentin për të cilin tha se Zyrës së Prokurorit të Specializuar ia ka dhënë vetë ai, Fondaj tha se bëhet fjalë për dokumentin që ka përgatitur Halil Çadraku bashkë me Sadik Halitjahën.
Për Çadrakun, dëshmitari tha se ka qenë përgjegjës për sektorin për Zbulim dhe Kundërzbulim (ZKZ). Për ZKZ-në, dëshmitari u pyet se a njihet edhe si Shërbim i Inteligjencës apo Informativ.
“Unë nuk i di këto realisht në kuptim. Në fazën kur kam qenë si shef shtabi ne e kemi titullu si Zbulim-Kundërzbulim”, u përgjigj dëshmitari.
Më pas, atij iu prazantua një dokument i cili supozohet të tregonte për një takim të Shtabit të Përgjithshëm të UÇK-së në Divjakë në janar të 1999-ës, “në të cilën sipas prokurorit thuhet se Kurtesh Fondaj ka thënë se nuk kanë çka lypin aty ‘gjarpna’ dhe se ata e njohin vetëm Bislim Zyrapin”.
“Nuk besoj. Për mua, realisht anëtarët e Shtabit të Përgjithshëm kanë qenë njerëz me autoritet te unë shumë të respektuar. Njerëz të respektuar dhe jam mundu me qenë shumë korrekt. Po kam bindjen që edhe ata kanë qenë shumë korrekt në raport me mu dhe nuk është në stilin dhe natyrën time me fol me këtë fjalor”, tha Fondaj.
Pas kësaj, dëshmitarit iu prezantua edhe një dokument që supozohet që në atë takim është thënë diçka për Thaçin, fjalë të cilën e quajti “skandaloze”.
Dëshmitari Fondaj thotë se në shkurt të ‘99-ës është pyetur nga Sokol Dobruna për rastin e Blerim Kuçit.
Dëshmitari Kurtesh Fondaj tha se kishte dhënë dëshmi në mbrojtje të Blerim Kuçit në shkurt të 1999-ës, por që pyetjet ia kishte bërë Sokol Dobruna, që sipas tij ishte prokuror në këtë rast.
“Deklaratën… e kam dhënë në Divlakë,.. gjatë muajit shkurt të vitit 1999. Unë deklaratën e kam dhënë para Sokol Dobrunës dhe çdo herë jam i bindur që ai ka qenë prokuror në rastin e Blerimit. Pra, unë e kam dhënë deklaratën para tij në prezencën e avokatit mbrojtës të Blerim Kuçit, Agron Berisha dhe një procesmbajtës, respektivisht i cili ka evidentu komplet atë që kam fol dhe kam dhënë dëshmi në një fletore”, tha Fondaj.
Kujtojmë se Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Në nëntor të vitit 2020, në paraqitjet e tyre të para, Jakup Krasniqi, Hashim Thaçi, Kadri Veseli dhe Rexhep Selimi janë deklaruare të pafajshëm.
