Të paktën 13 persona kanë vdekur në Kenia gjatë demonstratave antiqeveritare që u kthyen në kaos, tha sot përfaqësuesi i Shoqatës Mjekësore Kenia Simon Kigondu, duke vlerësuar se numri është i përkohshëm.
Policia tha se gjatë natës qëlloi më shumë se 700 fishekë të drejtpërdrejtë ndaj protestuesve në Githurai, një periferi e Nairobit, raporton AP.
Demonstruesit, të cilët kundërshtojnë projektbuxhetin për periudhën 2024-2025 dhe taksat e reja, dje kanë hyrë me dhunë në ndërtesën e Kuvendit dhe i kanë vënë flakën një pjese të tij dhe deputetët janë larguar.
Presidenti William Ruto i quajti protestat “tradhtare” dhe u zotua të shuante trazirat “me çdo kusht”.
Më shumë se 100 persona u plagosën, sipas organizatave të shoqërisë civile. Nuk dihet ende sa persona janë arrestuar.
Sekretari i Përgjithshëm i Kombeve të Bashkuara, Antonio Guterres shprehu keqardhjen për të dhënat për të vdekurit dhe të plagosurit.
Protestuesit janë kryesisht të rinj të frustruar nga rritja e çmimeve të karburanteve, ushqimeve dhe nevojave të tjera.
Kundërshtimi ndaj buxhetit ka bashkuar pjesën më të madhe të vendit, me disa që hedhin poshtë në mënyrë eksplicite ndarjet fisnore që kanë ndarë Kenian në të kaluarën.
Disa nga njerëzit që e mbështetën me pasion Ruton u ndjenë të tradhtuar.
Mediat vendase prej ditësh po flasin për nevojën e dialogut.
Aktivistja keniane Auma Obama, gjysmë motra e ish-presidentit amerikan Barack Obama, ishte gjithashtu në protesta dje, raporton Reuters.
Gaz lotsjellës u hodh në turmën ku ajo ishte, para Parlamentit Kenyan.
