Në ULCINJ të Malit të Zi së fundmi është hapur një seksion i Pearl Beach, i cili është i dedikuar ekskluzivisht për femrat me hixhab, shkruan Klix.ba.
Plazhi është i mbyllur që femrat ta shijojnë pa frikë nga paragjykimet. Janë vendosur rreth 20 shezlongë dhe mbrojtja e privatësisë është prioritet. Pearl Beach është i pari i këtij lloji në Adriatik dhe plazhet si ky nuk janë asgjë e re në botë.
U theksua se të gjithë vizitorët duhet të respektojnë rregullat dhe zakonet e asaj zone. Në Islam, hixhabi përshkruhet si “mburojë me të cilën gratë mbulojnë trupin dhe gjithçka përveç fytyrës dhe duarve, duke mbrojtur kështu veten nga shikimi i padëshiruar i burrave”.
Meqë ra fjala, hixhabi ka nxitur debatin prej vitesh. Taxhikistani, një vend me 96% myslimanë , miratoi një ligj që ndalon mbajtjen e hixhabit. Ai është i fundit në një seri prej 35 ligjesh gjithëpërfshirëse që lidhen me fenë. Autoritetet pretendojnë se qëllimi është “mbrojtja e vlerave kulturore kombëtare” dhe “parandalimi i bestytnive dhe ekstremizmit”.
Ligji, i cili u miratua nga dhoma e lartë e parlamentit të enjten e kaluar, ndalon përdorimin e “veshjeve të huaja”, duke përfshirë hixhabin, mbulesën e kokës që mbajnë gratë muslimane. Në vend të kësaj, qytetarët Taxhik inkurajohen të veshin kostumin kombëtar taxhik.
