Trupat e tre personave janë gjetur në një shtëpi private në Sarajevë pas ndërhyrjes së zjarrfikësve të cilët kanë mbërritur aty për shkak të zjarrit dhe bëhet fjalë për vdekje të lidhura me një mosmarrëveshje familjare.
Zjarrfikësit ndërhynë mbrëmjen e së enjtes pas raportimit për një shpërthim dhe zjarr në një shtëpi në vendbanimin Shirokaça, në pjesën e vjetër të qytetit, ku gjetën trupat e dy burrave dhe një gruaje. “Ne mund të konfirmojmë se tre trupa u gjetën në shtëpi,” tha Azra Bavçiq, zëdhënëse e Prokurorisë së Qarkut të Sarajevës.
Sipas të dhënave të mëngjesit të së premtes dhe të raportuara nga mediat vendase, kjo tragjedi ka ardhur si pasojë e një përplasjeje mes dy vëllezërve, pas konflikteve të ndërsjella që kanë zgjatur prej muajsh, të cilat janë parë edhe nga fqinjët.
Vëllai i madh vrau vëllain e vogël dhe gruan e tij dhe më pas i vuri flakën shtëpisë?
Supozohet se vëllai i madh vrau vëllain e vogël dhe gruan e tij të enjten në mbrëmje, dhe më pas i vuri flakën shtëpisë. Sipas Dnevni avaz, që citon një familjar, autorë të përplasjes kanë qenë vëllezërit Almir dhe Muamer Çesir.
“Almir Çesiri erdhi me armë dhe fillimisht qëlloi pesë-gjashtë plumba për t’i trembur. Ai fillimisht e plagosi Muamerin në këmbë, gruaja vajtoi dhe policia tha: “Qetësohuni”. Më pas Almiri hodhi një bombë dhe gjithçka mori flakë fqinji i telefonoi menjëherë për të shtënat, kështu që erdhi policia”, tha xhaxhai Kasim Çesir.
Trupat që u gjetën pas shuarjes së zjarrit janë djegur plotësisht. Po punohet për zbardhjen e të gjitha rrethanave të kësaj tragjedie.
