Mijëra demonstrues u mblodhën sot në rrugët e qytetit spanjoll Malaga për të protestuar kundër turizmit masiv dhe çmimeve të banesave që janë rritur për shkak të numrit të madh të turistëve.
Protesta u organizua nga Unioni i Qiramarrësve me moton “Malaga për të jetuar, jo për të mbijetuar”, dhe zëdhënësi i kësaj organizate tha se banorët janë në kushte të vështira dhe se duhet zgjidhur problemi i banesave.
Demonstruesit mbanin pankarta me mbishkrimet “Malaga nuk shitet” dhe “Paga të ulëta, apartamente për milionerët”, ndërsa në protestë u mblodhën njerëz të moshave të ndryshme, raporton Pais.
Málaga është qyteti i tretë më i shtrenjtë në Spanjë me qira, pas Madridit dhe Palmës, dhe muajin e kaluar kryebashkiaku Francisco de la Torre njoftoi masa të reja për të kufizuar numrin e apartamenteve me qira për turistët.
Protesta të ngjashme kundër turizmit masiv u mbajtën më parë në Ishujt Kanarie dhe Balearik, si dhe në Barcelonë.
