Kryetarja e Kuvendit të Sllovenisë, Urska Klakoçar Zupançiq, ka theksuar se shteti i saj do të vazhdojë ta mbështesë fuqishëm Kosovën në të gjitha proceset drejt anëtarësimit në institucionet euro-atlantike.
Ajo në konferencë për media pas takimit me kryeparlamentarin Glauk Konjufca, ka thënë se raporti ndërmjet dy vendeve është i shkëlqyeshëm dhe duan që të shohin që bashkëpunimi të vazhdohet në të gjitha fushat.
“Kemi marrëdhënie të shkëlqyeshme dhe bashkëpunimi ynë është i kënaqshëm në aspekte të ekonomisë. Kuvendi ynë është i gatshëm që t’i ndaj praktikat e mira sa i përket eksperiencës që Sllovenia e ka me BE-në në përmbushjen e kritereve për anëtarësim. Kosova dëshiron të bëhet anëtare e BE-së dhe Sllovenia këtu mund ta ndihmojë shumë. Ne e mbështesim perspektivën evropiane dhe anëtarësimin e vendit tuaj në KiE dhe rrugëtimin tuaj në integrimet euroatlantike. Kjo është kyçe për mirëmbajtjen paqes e stabilitetit në Kosovë por edhe në rajonin më të gjerë. Përmbushja e marrëveshjes si pjesë e dialogut Kosovë – Serbi është kyçe për sukses. Dialogu është e vetmja rrugë përpara”, ka theksuar Zupançiq.
Ajo ka thënë se shteti i saj mbetet i përkushtuar për stabilitetin e Kosovës dhe do të vazhdojë të jetë prezent si pjesë e KFOR-it.
“Sllovenia është mike e Kosovës, do të mbesim të tillë dhe do të ju mbështesim në të gjitha përpjekjet e juaja për anëtarësim në mekanizmat e ndryshëm evropianë”, ka shtuar ajo.
E pyetur rreth këmbënguljes së autoriteteve kosovare që marrëveshja në Bruksel ta ketë në qendër njohjen reciproke kryeparlamentarja sllovene ka thënë se kjo do të ishte gjë shumë e mirë dhe do të ndikonte në të ardhmen e të dyja vendeve. “Po, kjo mund të ndihmojë nëse të dyja vendet e njohin njëra-tjetrën. Vendet fqinje mund të përpiqen të që të ndikojnë këtu. Ne, do të përpiqemi të ndikojmë në këtë drejtim dhe mendoj se njohja reciproke do të ishte shumë e mirëseardhur për të ardhmen. E dimë se ka pyetje të hapura për të dyja vendet dhe do të jetë e vështirë që ato të zgjidhen pa ndihmën e vendeve tjera. Vende kyçe të BE-së besoj do t’iu ndihmojnë në këtë aspekt”, ka shtuar Zupançiq.
Ajo tutje ka thënë se Sllovenia është e gatshme ta ndihmojë Kosovën edhe në procesin e njohjes nga pesë vendet e BE-së që ende nuk e kanë njohur pavarësinë e saj. “Është e rëndësishme gjithashtu që vendet e treta ta njohin sovranitetin e të dyja vendeve, sepse atëherë të dyja vendet do të jenë në të njëjtin nivel. Nëse kemi vende të treta që nuk e njohin Kosovën kjo bëhet më e vështirë. Sllovenia e cila e njeh rajonin mirë, mund ta qartësojë situatën për vendet e tjera evropiane që nuk janë të familjarizuara me këtë rajon dhe nuk e kuptojnë historinë e përbashkët të këtij rajoni. Patjetër, se ne do t’i adresojmë të gjitha këto çështje dhe shpresoj se do të jemi konstruktiv në këtë drejtim”, ka nënvizuar kryeparlamentarja sllovene.
