Ferdie Hyseni ish-delegate atëhershme e Kuvendit të Kosovës kur është miratuar Deklarata Kushtetuese e 2 Korrikut, 34 vjet me parë, e ftuar në ‘Info Plus’ të RTK-së, ka kujtuar 2 korrikun e vitit 1990, duke thënë se kjo datë përcillet me emocione dhe nuk ishte punë e lehtë sepse Beogradi kërcënonte.
Ajo tha se Deklarata Kushtetuese e 2 Korrikut 1990 e ka zhvlerësuar Rezolutën e Konferencës së Prizrenit, të vitit 1945.
“Nuk janë pak 34 vite nga kjo datë, porse mua më duket që ka ndodhur qe një kohë të shkurt. Natyrisht që ne këtë distancë kohore e kujtojmë me emocione, mburrje dhe krenari që ja kemi arritur t’i dalim në fund gjithë atij detyrimi, që e kishim karshi popullit ”, tha Ferdie Hyseni në RTK.
Ajo tregon se si delegatë të Kuvendit të Kosovës, janë zgjedhur në zgjedhje të jashtëzakonshme, pas ngjarjeve të 23 marsit 1989 kur i është suprimuar autonomia Kosovës nga kushtetuta e vitit 1974.
“Sapo kemi marrë mandatin kemi pasur presion me amendamentimin e ligjeve që vinin nga Beogradi, dhe pas dy seancave të mbajtura kemi filluar të bëjmë rezistencë praktike kundër të gjitha ligjeve e amendamenteve që i kishte bërë Serbia për Kosovën”, tha ajo.
Tutje, Hyseni është shprehur se nga këto presione ka filluar iniciativa për 2 korrikun e vitit 1990, sepse siç tha ajo, kauza tashmë veç dihej se çka duan dhe pse janë deputetë.
“Natyrisht që kjo punë nuk ka shkuar aq lehtë, megjithatë suksesi erdhi dhe se për këtë punë janë bërë shumë përgatitje ”, tha Hyseni.
Ndryshe, 34 vjet më parë delegatet e Kuvendit te Kosovës, miratuan deklaratën kushtetuese të 2 korrikut. Kjo deklaratë shënon në moment të rëndësishëm politiko-juridik, për vendin tonë. Me anë të kësaj deklarate është shprehur aspirata e popullit të Kosovës për liri dhe pavarësi. Kjo deklaratë është shpallur nga 114 delegatët e Kuvendit të atëhershëm të Kosovës.
