Budakova e Suharekës në të gjitha kohërat ishte pishtare e lirisë së Kosovës. Duke ndjekur rrugën e atdhetarëve të parë si Zenun Kepa e të tjerë, djemtë e kësaj ane u rreshtuan në radhët e UÇK-së për të çliruar përfundimisht vendin.
Në batalionin e dytë të Budakovës u rreshtuan qindra qytetarë që nuk e duruan robërinë. U vranë 32 dëshmorë e i pari që ra në luftë të pabarabartë më 3 korrik ishte Kadri Kokollari.
“Batalioni i Budakovës afërsisht ka pas rreth 400 ushtarë të ndarë në kompani. Një prej batalioneve që ka pas të paraqitur më së shumti vullnetar. Aq shumë ka pas saqë s’kemi pasur as vend për sistemim e as armatim. Ne jemi gjeneratat më me fat që bëmë diçka e po e gëzojmë, kurse si Zenun Kepa e të tjerë bënë shumë po nuk patën fatin ta gëzojnë”, ka thënë Halil Krasniqi, ish luftëtar i UÇK-së.
Lufta e 3 korrikut u zhvillua në një distancë të afërt, por forcat serbe nuk arritën të na gjunjëzojnë, kujton Ali Kepa.
“UÇK-ja është pronarja e këtij vendi dhe pas UÇK-së ky vend flet shqip, frymon shqip. E kemi bërë një luftë që kemi ndërgjegjësua botën. Është modeli që 13 ose 15 metra i kemi pas forcat serbe, por nuk kanë mundur as me na pa e as më na marrë kufomën që është modeli më unikat në UÇK”, ka thënë Kepa.
Ndërkaq përfaqësuesi i fshatit, Izet Buzhala, tha se detyra e të gjithëve ka qenë luftimi.
“Ka qenë detyrë e të gjithëve por dikush pati fatin me u vra e dikush me u plagos, të gjithë i falënderojmë, por vepra e dëshmorëve nuk harrohet kurrë, ata janë të pa harrueshëm”, tha Buzhala.
Batalioni i dytë i Budakovës i dha lirisë së vendit 32 dëshmorë, ndërsa si zonë u flijuan 120 dëshmorë, që në ditët e sotme kujtohen me pietet të lartë.
