Presidenti ukrainas Volodymyr Zelensky tha sot se i kërkoi kryeministrit hungarez Viktor Orban, i cili po viziton Kievin, t’i bashkohet përpjekjeve të paqes të Ukrainës, ndërsa Orban bëri thirrje për t’i dhënë fund konfliktit.
“I bëra thirrje Hungarisë dhe kryeministrit Orbán që të bashkojnë përpjekjet që synojnë organizimin e një samiti të ri për paqen në Ukrainë”, tha Zelensky, në fjalimin e tij të përditshëm drejtuar qytetarëve.
Zëvendës shefi i kabinetit të presidentit ukrainas, Igor Jovkva, tha në televizionin ukrainas se Zelensky “dëgjoi propozimin e Orban për një armëpushim, por ai përcolli qëndrimin e tij për të”.
Plani i paqes i mbrojtur nga Zelensky, që nga fillimi i luftës, parashikon tërheqjen e forcave ruse nga territori ukrainas, gjykimin e zyrtarëve rusë përpara një gjykate ndërkombëtare dhe pagesën ruse të reparacioneve. Rusia e hodhi poshtë një plan të tillë.
Meqenëse ky plan dështoi të fitonte mbështetje edhe gjatë samitit të paqes të mbajtur në qershor në Zvicër, pa Rusinë, Zelensky tha se po punonte për një plan të ri për t’i dhënë fund konfliktit, me synimin për të fituar mbështetjen e një pjese më të madhe të komunitetit ndërkombëtar. .
Presidenti rus Vladimir Putin paraqiti zgjidhjen e tij të propozuar: që Ukraina të lëshojë pesë rajone të pushtuara pjesërisht nga Moska dhe të heqë dorë nga anëtarësimi në NATO. Kjo zgjidhje u refuzua nga Ukraina dhe vendet perëndimore.
Megjithatë, Zelenski i cilësoi rezultatet e bisedimeve me Orbanin si të mira.
“Ne shohim se marrëdhëniet midis Ukrainës dhe Hungarisë janë krejtësisht të ndryshme tani. Ato janë konkrete dhe ne kemi parasysh nevojat e të dy vendeve”, tha presidenti i Ukrainës.
