Pesë ish-punonjës të forcave të armatosura siriane të cilët dyshohen për krime lufte kundër popullatës civile të Sirisë janë arrestuar sot në Gjermani.
Pesë të arrestuarit, katër palestinezë pa shtetësi nga Siria dhe një shtetas sirian, dyshohet se kanë marrë pjesë në shtypjen e protestave kundër regjimit në vitin 2012 si pjesë e formacioneve speciale të bashkuara nga qeveria e Bashar Al-Asad, në të cilat u vranë gjashtë protestues.
Përveç këtyre krimeve të luftës, të dyshuarit akuzohen edhe për torturim të të burgosurve politikë, kidnapim dhe tjetërsim të paligjshëm të pronës. Të dyshuarit u arrestuan me urdhër të Zyrës së Kryeprokurorit të Shtetit në Karlsruhe në vende të ndryshme në të gjithë Gjermaninë, ndërsa një i dyshuar tjetër është në kërkim.
Arrestime edhe në Suedi
Në të njëjtën kohë, në kuadër të të njëjtit hetim, në Suedi u arrestuan edhe tre anëtarë të të njëjtit grup. Katër të dyshuarit palestinezë ishin anëtarë të milicisë së armatosur Lëvizja e Palestinës së Lirë (FPM), të cilën regjimi e përdori për të kontrolluar lagjen Al Yarmouk në Damask, e cila doli nga një kamp refugjatësh palestinezë.
Në bllokimin e kësaj lagjeje në vitin 2013 kanë marrë pjesë edhe anëtarë të FPM-së, gjatë së cilës për shkak të mungesës së ushqimit, ujit dhe barnave, në këtë lagje kanë humbur jetën një numër i panjohur i palestinezëve. FPM punoi ngushtë me seksionin e shërbimit sekret sirian që ishte në krye të palestinezëve në Siri.
Të dyshuarit besohet se kanë mbërritur në Gjermani gjatë krizës së refugjatëve të vitit 2015, kur shumica kaluan kufirin pa dokumente identifikimi.
