Vetëm 15% e agjendës legjislative është realizuar në gjashtëmujorin e parë të vitit 2024, sipas raportit të Institutit të Kosovës për Drejtësi.
“Gjendja nuk është e kënaqshme, por s’është as e mirë, është në nivelin më të ulët prej se Qeveria Kurti II e ka marrë qeverisjen. Nga shkurti i vitit 2021, në secilin gjashtëmujor përqindja ka qenë 42 apo 52%. Pastaj ka shkuar duke rënë në 48, 42, 38. Por kurrë s’ka dal përmbi 50%. Në ndërkohë për gjashtëmujorin e parë të këtij viti, Qeveria del që s’ka arritur t’i miratojë më shumë se 15% të projektligjeve të cilat i ka të planifikuara”, ka thënë Naim Jakaj, drejtor i këtij Instituti në “Info Plus” të RTK-së.
Jakaj ka thënë se planifikimet për miratime të projektligjeve nuk kanë përkuar me gjendjen reale.
Ndërkaq në raport thuhet se sipas programit legjislativ, Qeveria planifikoi miratimin e 52 projektligjeve deri në qershor, por nga 52, ajo miratoi vetëm 8, ose 15% të projektligjeve të planifikuara. Gjatë kësaj periudhe, Qeveria miratoi edhe 10 marrëveshje ndërkombëtare që nuk ishin planifikuar për miratim në programin legjislativ. Nga ana tjetër, Qeveria tregoi shpejtësi në miratimin e dy projektligjeve: njëri i planifikuar për shtator dhe miratuar në qershor (Projektligji për Financimin e Menaxhimit të Resurseve Ujore) dhe tjetri planifikuar për dhjetor dhe miratuar në prill 2024 (Projektligji për Provimin e Maturës Shtetërore).
