Në Klinikën e Onkologjisë së Qendrës Klinike Universitare të Kosovës u bë promovimi i sistemit laserik C-RAD të gjurmimit optik 3D, i vetmi në rajon me një teknologji të tillë.
Pritet që brenda dy muajve, pas trajnimit të stafit mjekësor, të fillojë trajtimi i pacientëve me këtë teknologji të avancuar.
Shërbimi Spitalor Klinik Universitar i Kosovës (ShSKUK), përmes një postimi në Facebook shpjegoi se laseri C-RAD për pozicionim në radioterapi ofron një gamë të gjerë trajtimesh, duke përfshirë terapi të precizionit dhe efikasitetit të lartë në trajtimin e sëmundjeve onkologjike.
“C-RAD ofron një pozicionim shumë të saktë te pacientit, duke siguruar që rrezatimi të drejtohet saktësisht në zonën që duhet trajtuar, ndërsa minimizohet ekspozimi i indeve të shëndosha dhe komplikacionet edhe efektet anësore të mundshme, pas trajtimit me radioterapi”, thuhet në njoftim.
Ndër të tjera ky laser shkurton kohën e nevojshme për përgatitjen dhe trajtimin e pacientëve, duke përmirësuar efikasitetin e punës në klinikë. Gjithashtu ofron zgjidhje për menaxhimin e lëvizjes së frymëmarrjes, duke lejuar trajtimin e saktë të tumoreve në zonat që lëvizin me frymëmarrjen, siç janë mushkëritë dhe gjoksi. /Kosovatimes/
