Kryetari i Komunës së Drenasit, Ramiz Lladrovci, ka vizituar punimet në Kalanë e Vuçakut, ku ka takuar arkeologun Sami Haziraj me ç`rast u informua për gjetjet e para disa ditëve si dhe kushtet e rrethanat në të cilat po zhvillohen këto gërmime.
Në këto gërmime, është zbuluar një altar romak në murin rrethues të kalasë, i cili daton në gjysmën e parë të shekullit III të Epokës së Re. Ky altar është një spolie i ripërdorur në ndërtimin e kalasë gjatë periudhës së Justinianit (527-565).
Lladrovci përmes një postimi në Facebook u shpreh se zbulimet arkeologjike tregojnë për vazhdueshmërinë e jetës në këtë vend nga parahistoria, në mesjetë e deri më sot.
“Ky zbulim tregon se Kalaja e Vuçakut ka qenë një vend i rëndësishëm për jetën shoqërore në zemrën e Kosovës, duke qenë në lidhje me Kalanë e Vërbocit dhe Gradinës së Llapushnikut, të cilat do të hulumtohen dhe harta arkeologjike do të pasurohet për komunën tonë dhe Kosovën si destinacion turistik-arkeologjik me vlera të mëdha”, tha ai.
Gjithashtu Kryetari I Drenasit u shpreh se niveli qendror do të duhej të ishte përgjegjës për investimet në këtë drejtim në mënyrë që të ndriçohet e kaluara jonë dhe i vendit gjatë periudhave të ndryshme historike
Kalaja e Vuçakut, ndodhet rreth 12 kilometra në jugperëndim të Drenasit, shtrihet mbi dy kreshta shkëmbore dhe ka qenë një pikë e rëndësishme gjeostrategjike që nga antikiteti. Kjo u dëshmua me muret rrethuese, mbrojtëse dhe banimit të hershëm, ku u zbulua spolia me shkrim dedikuar një perandori romak.
Gërmimet arkeologjike në Kalanë e Vuçakut kanë filluar në vitin 2017 nga Instituti Arkeologjik i Kosovës, nën udhëheqjen e arkeologut Shafi Gashi. Megjithatë, ato u ndërprenë në vitin 2019 për shkak të mungesës së buxhetit, ndërsa në kohën e pandemisë, gërmimet u ndërprenë plotësisht dhe rifilluan në vitin 2024. /Kosovatimes/
