Deputeti i LDK-së, Driton Selmanaj, me rastin e përvjetorit të pavarësisë së Shteteve të Bashkuara të Amerikës, u shpreh se më e rëndësishme se urimet për ShBA-në, do të ishte nëse Qeveria Kurti dhe shumica parlamentare e “Lëvizjes Vetëvendosje!” do të përvetësonin vlerat amerikane.
Selmanaj, përmes një postimi në faqen e tij zyrtare në Facebook, tha se pothuajse çdo zyrtar në Qeveri dhe Parlament ka uruar përvjetorin e pavarësisë dhe kjo është një gjë e mirë, por që qeveria e Kurtit së pari do të duhet të përvetësojë disa vlera amerikane.
“Nuk është vlerë amerikane të shkelësh Kushtetutën e Republikës me dhjetra herë. Nuk është vlerë amerikane të sulmosh gjykatat. Nuk është vlerë amerikane të tentosh të kontrollosh ekonominë e lirë të tregut. Nuk është vlerë amerikane të tentosh të kontrollosh dhe të mbyllësh mediat. Nuk është vlerë amerikane të nënshkruash kontrata sekrete multimilionëshe. Nuk është vlerë amerikane ta shkatërrosh administratën shtetërore. Nuk është vlerë amerikane ta fyesh dhe ta sulmosh opozitën. Nuk është vlerë amerikane të falësh borxhet ndaj shtetit”, u shpreh ai.
Tutje, Selmanaj shtoi se më e rëndësishme se urimet dhe simbolikat me flamur amerikan, do të ishte implementimi i vlerave amerikane nga qeveria e Albin Kurtit. /Kosovatimes/
