Anëtarët e Komisionit Parlamentar për menaxhimin e marrëdhënies së punës të anëtarëve të Shërbimit të Jashtëm dhe zyrtarëve të Ministrisë së Punëve të Jashtme dhe Diasporës, janë duke intervistuar ish-sekretarin e kësaj ministrie, Behar Isma.
Ish-sekretari i Punëve të Jashtme dhe Diasporë,Isma, ka akuzuar ish-ministrin Enver Hoxhaj për punësime të paligjshme të diplomatëve në vitin 2011, gjatë deklarimit të tij në Komisionin Hetimor Parlamentar.
Sipas tij, Këshilli i Pavarur Mbikëqyrës ka konstatuar se ata nuk janë pranuar në bazë të ligjit për shërbimet e jashtme dhe ligjit për shërbimin civil.
Anëtarët e komisionit e kanë pyetur Ismën për ligjshmërinë e rritjes së koeficientit të pozitës së tij për 100%, ngritjen për pesë grada të tij në prill të këtij viti si dhe një sërë çështjesh të tjera.
Ish-sekretari Isma tha se në bazë të Këshillit të Pavarur Mbikëqyrës ka konstatuar se të gjitha këto emërime janë kundërligjore.
“Përmes procedurave të këtij konkursi del se janë propozuar disa kandidatë të cilët janë jashtë dispozitës ligjore, ministri i asaj kohe kishte përzgjedhur persona konkret të cilëve u ka lëshuar vendim për t’i dërguar në misione diplomatike. Përzgjedhja e tyre dhe vendimi i lëshuar për ta është bërë sipas praktikës së ngjashme me atë që bëhen emërime dhe angazhime të emëruarve politik. Vendimi për angazhimin e tyre në mision, duke pas si referencë atë konkurs, përmban vendimin, gradën, misionin, si dhe pagën në të njëjtën vendim. Se ky konkurs dhe kjo procedurë e dërgimit të emëruarve politik me vendim të ministrit nuk ka qenë as për së afërmi në përputhje me legjislacionin në fuqi për shërbyesit civil të cilët edhe e ka bërë vlerësimin Këshilli i Pavarur Mbikëqyrës për shërbimin civil ndër disa vendime të tij. Me rastin e kthimit nga misioni i tyre një pjesë e tyre janë sistemuar në Ministri dhe kanë udhëhequr me departament. Edhe Këshilli e konfirmon se këta nuk janë pranuar më bazë të ligjit për shërbimet e jashtme dhe ligjit për shërbimin civil. Këshilli i Pavarur Mbikëqyrës ka vlerësuar si kundërligjore këto sisteme edhe në shumë raste”, ka thënë ai.
Isma i është kundërpërgjigjur për këtë të fundit me Raportin e Punës së komisionit për grada dhe disiplinë, të vitit 2018.
“Kriteri mbi të cilën bëhet gradimi është koha kur një zyrtar është punësuar. Me rregulloren e vitit 2009 të Shërbimit të Jashtëm ka qenë periudhë 2-vjeçare, ndërkaq në vitin 2018 rregullorja është plotësuar e ndryshuar dhe nga 2 vjet është shndërruar në 1 vit. Pas kalimit të kushtit të kohës, është pozita që mban, kriteret e kualifikimet dhe përvoja e vlerësimet nga eprorët”, ka thënë Isma.
