Kryeministri SLLOVAK Robert Fico u shfaq sot në publik për herë të parë që kur ishte viktimë e një atentati në maj.
Fico, i cili është rikuperuar pasi u qëllua katër herë në mes të majit, mbajti një fjalim në kremtimin e sonte të Ditës së Shën Kirilit dhe Metodit, një festë kombëtare në Sllovaki.
Fico u qëllua duke përshëndetur mbështetësit pas një takimi të kabinetit në qytetin qendror të Sllovakisë Handlova, pas së cilës iu nënshtrua disa orë operacioni dhe po shërohej në shtëpi që nga fundi i majit.
Sulmi u shpall sulm terrorist
Sulmuesi i tij, 71-vjeçari Juraj C., u ndalua dhe u akuzua për tentativë vrasje me paramendim. Prokurorët këtë javë e shpallën rastin një sulm terrorist.
Sulmi ndaj Ficos nënvizoi polarizimin e thellë të politikës në këtë vend të Evropës Qendrore me 5.4 milionë banorë.
Fico tha se nuk ndjen urrejtje ndaj sulmuesit të tij
Në një video-mesazh të publikuar në Facebook në fillim të muajit qershor, Fico e quajti sulmuesin e tij aktivist të opozitës, por ai gjithashtu tha se nuk ndjen urrejtje ndaj tij dhe se nuk do të kërkojë dëmshpërblim.
Sipas dokumenteve të gjykatës, i arrestuari ka deklaruar se donte të plagoste kryeministrin, por jo ta vriste. Ai shpjegoi se e bëri këtë sepse nuk ishte dakord me politikat e tij, veçanërisht me heqjen e zyrës së prokurorit special dhe vendimin për të pezulluar ndihmën ushtarake shtetërore për Ukrainën.
