Në 26 vjetorin, Kryetari i Lidhjes Demokratike të Kosovës (LDK), Lumir Abdixhiku ka përkujtuar të rënët e betejës së Loxhës.
“Në këtë përvjetor të Betejës së Lavdishme të Loxhës kujtojmë dhe nderojmë heronjtë e shquar të historisë sonë, të gjithë ata që lanë gjurmë të paharrueshme duke luftuar për rrugëtimin e Kosovës që të jetë e lirë dhe e pavarur.
Sot, nderojmë strategun, luftarakun, atdhetarin e madh, bashkudhëtarin si dhe njeriun e afërt të Presidentit Historik Dr. Ibrahim Rugova, Kolonel Tahir Zemaj. Po ashtu përkujtojmë dhe nderojmë Heroin Rrustem Bruçi, personalitetin e shquar të luftës për liri, juristin e aktivistin politik, komandantin e UÇK-së, e një ndër themeluesit e Lidhjes Demokratike në Deçan. Në Betejën e Lavdishme të Loxhës, ranë për të mos vdekur kurrë edhe heronjtë Lumni Surdulli dhe Enver Alaj, të cilët me trimërinë e pashoq treguan se ëndrrat kombëtare janë më të vlefshme se çdo gjë tjetër.
Gjaku i derdhur për liri, në Loxhën heroike është amanet për ne të gjallët që të mos e harrojmë të kaluarën tonë të përgjakur dhe të punojmë fort në forcimin e idealit të të rënëve për liri.
Lavdi të gjithë të rënëve në betejën e Loxhës!’’ /Kosovatimes/
