Inspektorati Policor i Kosovës ka dhënë 8 rekomandime ndaj Policisë së Kosovës për proceset e gradimit të rreshterëve.
IPK i ka dhënë këto rekomandime në kuadër të raportit “Vlerësimi i menaxhimit të procesit të gradimit për rreshter” ndaj Departamentit të Burimeve Njerëzore, Drejtorisë për Zhvillimin e Performancës dhe Karrierës si dhe Komisionin e procesit të gradimit.
“IPK në kuadër të Raportit ka dhënë tetë rekomandime, që kanë të bëjnë me nevojën e rishikimit të harmonizimit të bazës ligjore që rregullon procedurën e gradimit për zyrtarët policor me periudhën e realizimit të trajnimit themelor, përfshirjen e plotë të kritereve të aplikimit në kuadër të shpalljeve të proceseve të gradimit, aplikimin e masave kufizuese të aplikimeve në sistemin e menaxhimit të burimeve njerëzore (PRIMS), respektimin e parimit të përfshirjes në panele vlerësuese edhe të anëtarëve nga radhët e komuniteteve tjera etnike, përgatitjen më të mirë teknike të procesit të testimit me shkrim”, thuhet në komunikatën për media.
Sipas njoftimit, qëllimi i inspektimit ka qenë vlerësimi i integritetit të proceseve, si dhe më tej edhe njohjen e pozitave të lira, analizën e nevojave për personel të graduar dhe një sërë çështjesh të tjera.
IPK ka vlerësuar se gjetjet e këtij inspektimi janë me interes për strukturën përkatëse policore, përfshirë nivelin ekzekutiv, drejtues dhe atë administrativ. /Kosovatimes/
