Gjatë presidencës së BE-së, HUNGARIA do t’i “kujtojë” Serbisë se duhet të përmbushë standardet evropiane në rrugën e anëtarësimit, që përfshin marrëdhëniet e fqinjësisë së mirë, tha sot ambasadori hungarez në Kroaci, Csaba Demcsák.
Demcsák ishte i ftuar në seancën e Komitetit të Çështjeve Evropiane, ku prezantoi prioritetet e Hungarisë për presidencën gjashtëmujore të Bashkimit Evropian, e cila filloi më 1 korrik.
Përfaqësuesi i HDZ-së Andro Krstulović Opara e pyeti ambasadorin nëse gjatë asaj periudhe kryeministri hungarez Viktor Orban do ta përdorte miqësinë e tij me presidentin serb Aleksandar Vuçiq për t’i bindur ata të jenë më të orientuar drejt Evropës dhe më pak drejt botës serbe që eksporton në rajon.
Ambasadori hungarez, një mbështetës i madh i zgjerimit të BE-së në Ballkanin Perëndimor, tha se gjatë presidencës, Budapesti do të ketë më shumë mundësi të bisedojë me të gjitha vendet kandidate dhe t’u kujtojë atyre detyrimet e tyre nëse synimi i tyre është integrimi evropian.
“Atëherë ata duhet të përmbushin standardet evropiane, dhe kjo përfshin marrëdhëniet e fqinjësisë së mirë, sepse kjo është një nga vlerat themelore të Bashkimit Evropian”, tha ai.
“Budapesti udhëheq një lloj të ri diplomacie”
Vendet në rajon shpesh e akuzojnë Beogradin për eksportimin e destabilitetit në rajon. Rasti i fundit i tillë ishte votimi i rezolutës për Jasenovacin në Podgoricë, vendim i partive proserbe në Mal të Zi si përgjigje ndaj rezolutës në Srebrenicë në Kombet e Bashkuara. Elita politike kroate, por edhe politikanët malazezë, e vlerësuan këtë si një përpjekje të Serbisë për të përkeqësuar marrëdhëniet ndërmjet Zagrebit dhe Podgoricës dhe rrugën evropiane të Malit të Zi, vendit më afër anëtarësimit evropian.
Opara e pyeti gjithashtu ambasadorin për udhëtimet e fundit të Orban në Kiev, Moskë dhe Pekin. Të martën, kryeministri hungarez ndodhet në Uashington për një takim në krye të aleancës së NATO-s.
Demcsák tha se Budapesti po udhëheq një “lloji të ri diplomacie” që “hapet globalisht ndaj të gjithë faktorëve politikë”. Ai theksoi se çështjet e vështira nuk duhet të shmangen, por duhet të identifikohen drejtpërdrejt, prandaj biseda nuk ka alternativë.
Ambasadori hungarez tha se Orban kishte paralajmëruar paraprakisht vizitat e tij tek aleatët e NATO-s dhe se pas takimit në Uashington do të dorëzonte një raport në vendet e tjera të BE-së.
“Ne nuk mund të negociojmë në emër të BE-së, por ne mund të ndajmë përvojën tonë,” tha ai.
