Presidenti i SHBA Joe Biden tha se Uashingtoni dhe aleatët e tij në NATO do të shpallin masa të reja këtë javë për të forcuar mbrojtjen ajrore të Ukrainës. Kështu thuhet në një deklaratë të presidentit amerikan në lidhje me sulmin raketor rus, i cili vrau dhjetëra njerëz dhe dëmtoi ndërtesën e një spitali për fëmijë në Kiev, transmeton Zëri i Amerikës .
“Sulmet me raketa të Rusisë, të cilat sot vranë dhjetëra civilë ukrainas dhe shkaktuan viktima dhe shkatërrim në spitalin më të madh të fëmijëve të Kievit, janë një kujtesë e tmerrshme e brutalitetit të Rusisë”, tha Biden në një deklaratë.
Presidenti amerikan tha se do të presë liderët e NATO-s në Uashington këtë javë dhe gjithashtu do të takohet me presidentin ukrainas Volodymyr Zelensky “për të bërë të qartë se mbështetja e Ukrainës është e palëkundur”, tha Biden. Tema e luftës së Rusisë kundër Ukrainës do të jetë një nga më të rëndësishmet në samitin e NATO-s që hapet sot në Uashington.
Çështja se sa garanci të forta duhet t’i jepen Ukrainës në lidhje me anëtarësimin e saj në NATO është bërë një pikë kyçe e diskutimit midis 32 anëtarëve të organizatës në prag të samitit. Më herët u bë e ditur se Shtetet e Bashkuara dhe Gjermania kundërshtuan ftesën e Ukrainës në NATO këtë vit nga frika e përshkallëzimit të konfliktit.
Siç raporton CNN , duke cituar tre burime të ditura, në draft tekstin paraprak të komunikatës së përbashkët të anëtarëve të NATO-s pas samitit në Uashington, rruga e Ukrainës drejt anëtarësimit në Aleancën e Atlantikut të Veriut quhet “e pakthyeshme”. Megjithatë, kushtet e hyrjes së mundshme nuk tregohen.v
