Presidenti i Këshillit Kombëtar të Zvicrës, Eric Nussbaumer, në konferencën për media pas takimit me kryekuvendarin, Glauk Konjufca ka ritheksuar përkrahjen zvicerane për Kosovën.
“Zvicra është krenare me komunitetin e integruar mirë në shoqërinë tonë. Kontributi i kosovarëve në ekipin futbollistik është veç një dëshmi e vogël. Që nga viti 1998 bashkëpunimi zviceran ka qenë prezent dhe Kosova ka qenë vend prioritar deri më sot. Zvicra e mbështet Kosovën në fushat e rëndësishme të qeverisjes së mirë, zhvillimit të qëndrueshëm ekonomik, shëndetësia”, ka thënë ai.
Ai ka thënë se mbështetja do të vazhdojë edhe në fushën e sigurisë, duke ofruar mbi 200 mijë ushtarë zviceran në KFOR. Nuk ka lënë pa përmendur edhe tensionet në veri.
“I bëjmë thirrje qeverisë së Kosovës e të Serbisë që të adresojnë tensionet dhe të parandalojnë eskalimet. Për Zvicrën paqja e qëndrueshme në rajon dhe normalizimi i marrëdhënieve është shumë i rëndësishëm, andaj Zvicra e mbështet dialogun e ndërmjetësuar nga BE”, ka deklaruar Nussbaumer.
Ai ka thënë se bashkëpunimi ndërmjet Kuvendit të Kosovës dhe shërbimeve parlamentare të Zvicrës ka qenë rrëfim suksesi dhe do të zhvillohet më tutje në fusha të ndryshme.
Konjufca: Nëse Serbia nuk ndëshkohet për Banjskën, përsëritet në përmasa të mëdha
Kryetari i Kuvendit të Kosovës, Glauk Konjufca, e ka njoftuar presidentin e Këshillit Kombëtar të Zvicrës, Eric Nussbaumer për sigurinë në vend dhe ka kërkuar ndëshkim të Serbisë për sulmin terrorist në Bansjkë.
“Si temë e pashmangshme ishte siguria dhe rreziqet me të cilat po përballemi, për shkak të pretendimeve territoriale të Serbisë ndaj Kosovës. Ia shpreha shqetësimin tim presidentit se po qe se Serbia mbetet e pandëshkuar për agresionin terrorist në Bansjkë, Serbia ka për ta përsëritur këtë skenar por në përmasa shumë më të mëdha. Serbia duhet të shihet jo vetëm në rrezik për në Kosovë por për paqen dhe stabilitetin e gjithë Ballkanit Perëndimor”, ka thënë Konufca.
Konjufca falënderoi presidentin Nussbaumer për përkrahjen e Zvicrës drejt përpjekjeve të anëtarësimit në Këshillin e Evropës. Ai tha se integrimi në BE për Kosovën është bashkim në vlerat politike, kulturore e të qytetërimit. Tutje ai foli edhe për diasporën shqiptare në këtë shtet.
“Për shumë qytetarë të Kosovës, Zvicra ishte edhe atdheu i dytë, të cilët të detyruar nga rrethanat diskriminuese politike, ekonomike e sociale të ish-Jugosllavisë, e gjetën te Zvicra strehimin politik dhe mbështetjen socio-ekonomike për familjet e tyre dhe prej atje nuk e harruan kurrë Kosovën”, ka deklaruar Konjufca.