Në GJERMANI ka pothuajse 3000 banka. Nga bankat e mëdha në bankat private dhe bankat e kursimeve tek bankat kooperativë si Volksbank apo Raiffeisenbank. Por ka edhe banka që nuk do të pritej të merren me shërbimet e parasë në ditët e sotme. Ka dy banka që i përkasin Kishës Ungjillore dhe pesë që i përkasin Kishës Katolike. Dhe kthejnë miliarda euro, shkruan Deutsche Welle .
Banka ungjillore Bank für Kirche und Diakonie (KD Bank), me seli në Dortmund, ka një kapital prej rreth shtatë miliardë euro dhe është një nga bankat më të mëdha kooperativiste në Gjermani. Banka katolike Bank im Bistum Essen (BiB) ka një kapital prej rreth 6.5 miliardë euro.
Nëse një person dëshiron të hapë një llogari në njërën nga këto banka, ai nuk ka pse të deklarojë përkatësinë e tij fetare. Sepse si KD Bank ashtu edhe BiB janë banka universale që ofrojnë shërbime për individët privatë, nga kreditë për makina deri tek financimi i pasurive të paluajtshme.
Duke filluar në vitet 1920
KD Bank, si shumica e bankave të tjera të kishës, u themelua në vitet 1920 si një kooperativë për financimin e kishës dhe institucioneve bamirëse.
“Themeluesi ynë, teologu Martin Niemöller, donte të ndërtonte një kopsht fëmijësh, por nuk mundi të merrte një kredi nga bankat e kursimeve dhe bankat për këtë qëllim”, rrëfen Ekkehard Thiesler, president i Bordit Drejtues të Bankës KD.
Që nga themelimi i saj, fokusi i aktiviteteve të bankës nuk ka ndryshuar, thotë Thiesler: kreditimi i projekteve të Kishës dhe Diakonia. Këto janë banesat sociale, spitalet, kopshtet dhe shkollat. “Jemi të lumtur të financojmë projekte sociale dhe mjedisore. Për këtë kemi lënë mënjanë kredi në vlerë prej rreth tre miliardë euro.
Si shembull, Thiesler përmend ndërtimin e një shtëpie për të ndihmuar të rinjtë në dekanatin ungjillor të Mynihut. Gjithashtu, KG Bank jep hua për ndërtimin e banesave sociale dhe rehabilitimin e ndërtesave të vjetra, në mënyrë që të moshuarit që kanë jetuar atje për një kohë të gjatë të vazhdojnë të jetojnë atje në pleqëri.
Kushtet e kredisë janë shpesh më të favorshme
Sigurisht, kishat mund të marrin kredi për të financuar projektet e tyre edhe nga bankat komerciale, thotë Stephan Paul, profesor i financës dhe kreditimit në Universitetin Ruhr në Bochum.
Por bankat e kishave në atë zonë kanë disa avantazhe, thotë ai, sepse ato gjithmonë kanë investuar në “ndërtimin dhe mirëmbajtjen, modernizimin dhe zgjerimin e atyre ndërtesave dhe fokusi i tyre është në atë zonë”. Për më tepër, kushtet në bankat e kishave janë shpesh më të favorshme sesa në bankat e mëdha.
Natyrisht, as bankat e kishës nuk japin para. Por bankat kooperative nuk kanë të bëjnë me maksimizimin e fitimeve, thotë Thiesler, por me inkurajimin e projekteve sociale. Në të njëjtën kohë, ne përpiqemi të krijojmë marrëdhënie afatgjata me klientët, përmes kushteve të drejta dhe të favorshme, thotë Thiesler.
Kur bankat japin kushte të favorshme, kjo nuk shkon në dëm të tyre. Në këtë kuptim, bankat e kishës nuk ndryshojnë nga bankat tregtare. Kështu, KD Bank me 250 punëtorë vitin e kaluar ka realizuar një fitim neto prej 11.8 milionë euro.
Kjo sjell një divident prej rreth katër për qind për pronarët. Shumica e aksioneve të pronësisë mbahen nga anëtarët e institucioneve të kishës.
Për krahasim: Banka e Kursimeve Sparkasse Dortmund me rreth 1,250 punonjës dhe rreth 300,000 klientë realizoi një fitim prej rreth tetë milionë euro.
Shndërrimi në një bankë universale
Përveç klientëve të zakonshëm nga Kisha dhe Diakonia, KD Bank ndërkohë ka rreth 28,000 klientë privatë, të cilët shpesh lidhen me Kishën ose Diakoninë përmes punës ose punës vullnetare.
Ndërkohë, pesha e klientëve privatë në bilancin e bankës është rreth 10 për qind. Eksperti financiar Stephan Paul nuk është i befasuar nga prirja që klientët të përdorin bankat e kishës si universale. “Shumë klientë vlerësojnë kur marrin të gjitha shërbimet nga një bankë, nuk duan që blerja e një shtëpie të financohet nga një bankë, blerja e një makine nga një bankë tjetër”. Për më tepër, normat e interesit të ofruara nga bankat e kishës për klientët e tyre për kursime sipas kërkesës ose kursime me afat nuk janë më të këqija se ato të bankave të mëdha tregtare ose bankave të kursimeve.
Kjo vlen edhe për bankën kooperative katolike BiB, Bank im Bistum Essen. Edhe këtu fokusi është financimi i institucioneve sociale, nga kujdesi për të moshuarit dhe të pafuqishmit deri te spitalet.
BiB punëson pothuajse 180 bashkëpunëtorë dhe ka një bilanc prej 6.5 miliardë eurosh. Këto janë paratë që BiB dëshiron të përdorë për të filluar diçka, thotë CEO Peter Güllmann. “Ne jemi një bankë kishtare që ka një nga portofolet më të mëdha të kredive me 4.5 miliardë euro.
Politika e biznesit social-ekologjik përfshin gjithashtu një fond që financon institutet e mikrokredive në mbarë botën që i bëjnë mikrokreditë të disponueshme për njerëzit në vendet në zhvillim. “Me fondin tonë të mikrokredive, ne financojmë gjithsej më shumë se 750,000 njerëz në mbarë botën.”
Duke iu drejtuar klientëve privatë
Krahasuar me bankat e mëdha si Deutsche Bank, bankat e kishave duken si xhuxhë. Në vitin 2023, Deutsche Bank kishte më shumë se 90,000 punonjës dhe një bilanc prej 1,300 miliardë eurosh.
Por bankat e kishës japin përshtypjen se ato mund të pajtojnë veçanërisht paratë dhe etikën. Është gjithashtu thelbësore për bankat e kishës që biznesi të jetë pozitiv. Kështu, BiB vitin e kaluar ka marrë 1500 klientë të rinj privatë dhe kjo tendencë është në rritje.
Pothuajse 15 për qind e vëllimit të biznesit llogaritet nga klientët privatë, thotë Shefi i Menaxhimit Güllmann. “Klientët privatë janë një target grup i rëndësishëm për një bankë që ka orientim social dhe ekologjik. Ne nuk jemi një bankë që përqendrohet vetëm në institucione, por dëshiron të jetë e pranishme në shtresat e gjera të shoqërisë.”
Dhe prania në shoqëri nënkupton edhe financimin e kredive konsumatore dhe kredive për pasuri të paluajtshme. Që bankierët e BiB-së e dinë mirë punën e tyre, shihet nga bilanci i vitit të kaluar. Pas zbritjes së të gjitha taksave, fitimi neto arriti në më shumë se 30 milionë euro.
Edhe kreditë e favorshme për institucionet kishtare nuk jepen pa fitim. Kështu, dividenti për anëtarët e bankës kooperativë kishtare u rrit në 3.5 për qind. “Etika dhe përfitimi shkojnë së bashku, ato përshtaten së bashku dhe i përkasin së bashku në bankën tonë,” thotë kreu i Bordit Drejtues Güllmann.
