Kryetari i Komunës së Kaçanikut Besim Ilazi priti në takim përfaqësues të Komisionit Qendror të Zgjedhjeve ku u diskutuan format e reja të bashkëpunimit si dhe në veçanti, zbatimi i Ligjit për Zgjedhjet e Përgjithshme në Republikën e Kosovës, i miratuar nga Kuvendi i Kosovës.
Delegacioni i KQZ-së u përfaqësua nga Ilir Gashi dhe Burim Ahmetaj, si dhe nga Komisioni Komunal i Kaçanikut Artan Mezraja.
“Sipas Ligjit, për Zgjedhjet e Përgjithshme, komunat janë të obliguara që t’i ofrojnë mbështetje të nevojshme Komisioneve Komunave të Zgjedhjeve në kuptimin e sigurimit të hapësirave në punë, depo për material, për transport, objektet publike për nevoja të votimit apo ambiente tjera për organizimin e trajnimeve të komisionarëve dhe numëruesve si dhe hapësira për adaptimin e Qendrave Komunale të Numërimit. Gjithashtu, lidhur me këtë çështje, shumë shpejt do të bëhet nënshkrimi i një marrëveshje bashkëpunimi mes Komunës dhe KQZ-së”, thuhet në komunikatën e KQZ-së. /Kosovatimes/
