Presidentja Vjosa Osmani përfaqësoi Kosovën në aktivitetin përmbyllës të Samitit të NATO-s në Uashington. Osmani ka thënë se për Kosovën është hera e parë në histori që si shtet është përfshirë në aktivitetet e samitit të NATO-s.
“Për NATO-n ishte një përvjetor historik, 75 vjetori që u shënua në Uashington njëkohësisht edhe për Kosovën është një përvjetor historik sepse është 25 vjetori i hyrjes së forcave të NATO-s në Kosovë, që mbetet misioni më i gjatë, i suksesshëm dhe më i madh në historinë e kësaj aleance”, tha Osmani.
Ajo e vlerësoi pjesëmarrjen të një rëndësie të veçantë për Kosovën. Në përfundim të Samitit, Osmani bisedoi me presidentin amerikan, Biden, të cilin e falënderoi për kontributin dhe përkushtimin ndaj Kosovës. Në një intervistë për RTK-në Osmani po ashtu foli edhe për takimin me presidentin francez, Emmanuel Macron.
