Presidentja e Kosovës, Vjosa Osmani, gjatë pjesëmarrjes në Samitin e NATO-s në Uashington D.C, është takuar edhe me presidentin francez, Emmanuel Macron, me të cilin ka diskutuar për forcim të marrëdhënieve Kosovë-Francë.
“Diskutim përmbajtësor me presidentin Macron në Samitin e NATO-s në Uashington D.C lidhur me të ardhmen euroatlantike të Kosovës, reformat në fushën e sundimit të ligjit dhe forcimin e marrëdhënieve bilaterale ndërmjet Kosovës dhe Francës”, ka shkruar Osmani në “Facebook”.
Ndryshe presidentja e Kosovës, Vjosa Osmani, me ftesë të presidentit të ShBA-së, Joe Biden, ka përfaqësuar Kosovën në aktivitetin përmbyllës të Samitit të NATO-s në Washington D.C.
Është hera e parë në histori që Kosova përfshihet në një Samit të Aleancës së Shpresës.
Iniciativa Compact Ukraine, si aktivitet përmbyllës i Samitit të NATO-s, është pjesë e përkushtimit të NATO-s dhe partnerëve të saj për sigurinë afatgjate të Ukrainës. Kjo iniciativë e NATO-s, krijon një arkitekturë gjithëpërfshirëse të sigurisë për t`i forcuar kapacitetet mbrojtëse të Ukrainës. /Kosovatimes/
