Kryeministri i Kosovës, Albin Kurti, vizitoi qendrën e turizmit në Pejë. Atje, kryeministri pati mundësinë të vizitojë nga afër projektin “Turizmi i avanturës”, vlera totale e të cilit arrin në 262 mijë euro, prej të cilave 165 mijë euro nga Qeveria përmes Ministrisë së Administrimit të Pushtetit Lokal dhe 97 mijë euro nga Komuna e Pejës.
“Zyra e turizmit tashmë është rinovuar, ndërsa për zhvillimin e sektorit në këtë zonë, po vazhdon puna në vendosjen e vijave të ngjitjes, infrastrukturës përcjellëse, pushimoreve në shtigjet malore dhe shenjëzimin e shtigjeve. Ndërkohë nga buxheti i MAPL-së dhe projektit DEMOS, në Komunën e Pejës për vitet 2021 – 2024, janë financuar gjithsej 41 projekte në vlerën prej 3.3 milionë euro”, thuhet në njoftimin e qeverisë.
Sipas njoftimit, gjatë vizitës, kryeministri Kurti u takua dhe me përfituesit e projekteve të bashkëpunimit ndërkufitar Kosovë-Mali i Zi, të cilat po zbatohen në kuadër të investimeve të fondeve IPA nga Bashkimi Evropian dhe programit të BNK-së Kosovë-Mali i Zi.
Në total janë gjithsej 11 projekte që prekin vlerën prej 4,296,905 euro. Përfituese nga këto projekte janë komuna si Peja, Istogu, Juniku, Deçani, Klina dhe Gjakova, ndërsa nga Mali i Zi, ndër shumë komuna, janë edhe ato të Rozhajës, Tuzit, Ulqinit, Kolashinit e Plavës.
“Kryeministri Kurti theksoi rëndësinë e këtyre projekteve për zhvillimin e turizmit por edhe forcimin e bashkëpunimit bilateral mes dy shteteve tona”, thuhet në njoftim. /Kosovatimes/
