Në Ferizaj pjesa e parë e nënkalimit afër stacionit të policisë pritet të përfundojë në muajin tjetër, kurse punimet për pjesën e dytë pritet të nisin në shtator. Por, opozita në këtë komunë deklaron se jo vetëm që janë kundër këtij projekti, por sipas tyre ai nuk ka as leje ndërtimi. Qytetarët presin që sa më shpejt të përfundojnë punimet dhe të lehtësohet qarkullimi.
Vazhdojnë punimet për ndërtimin e pjesës së parë të nënkalimit tek stacioni policor në Ferizaj. Qytetarët shpresojë që sa më parë të përfundojë punimet.
“Unë mendojë që minutat janë vonës për këtë popull edhe tani kanë ardhur bashkatdhetarët edhe ne këtu. Ka vështirësi shumë të mëdha për makina që të dilet ka ngarkesa kolonë shumë ka vështirësi (kjo a mendon se e liron) ka për ta liruar shumë dhe për ta drejtuar Ferizajn”, ka thënë qytetari Beqir Beqiri.
LVV në Ferizaj, e cila është parti opozitare në këtë komunë, është kundër këtij projekti.
“Realisht qëndrimet tona për këtë projekt nuk kanë ndryshuar janë po të njëjta ato qëndrime që i kemi pasur edhe me nënkalimin e parë dhe tash me këtë të dytin. Jemi kundër një projekti të jashtëligjshëm i cili nuk ka as leje ndërtimi”, ka theksuar Fatbardha Reka, kryetare e LVV-së në Ferizaj.
Por, sipas zyrtarëve komunalë, pjesa e parë e nënkalimit pritet të jetën funksional nga fillimi i muajit gusht.
“Po si tërësi i gjithë projekti deri më tani është punuar mbi 60 % të punimeve i vlerës totale të projektit. Jemi në fazën finale të përfundimit të punimeve në pjesën nga rruga “Brahim Ademi” deri tek rruga ‘Ramadan Rexhepi” apo nga salla e sporteve deri tek spitali. Jemi duke e përgatitur këto ditë që sa më shpejtë të pastrohet e gjitha dhe të asfaltohet kjo pjesë e tunelit pasi që mendojmë që brenda maksimumi 15 ditëve të lëshohet kjo pjesë për qarkullim për vetura”, ka thënë për RTK, Meriton Hajdini, drejtor i Infrastrukturës në Ferizaj.
Punimet në pjesën e dytë të projektit të nënkalimit është paraparë të fillojë nga muaji shtator i këtij viti.
