Ministri i Punëve të Brendshme, Xhelal Sveçla, ka kërkuar identifikimin të kryesve e të sulmit me koktej molotivi në pastiqerinë “Sharri” në veri të Mitrovicës.
Sveçla ka thënë se qeveria ka bërë luftë të pandalshme për neutralizimin e ndikimit të grupeve kriminale serbe në veri, e që sipas tij, kanë arritur edhe të krijojnë rrethana për normalitet jetese për banorët atje.
“Ky fakt duket se i pengon edhe disa mbetjeve kriminale të Serbisë në veri me ç’rast në mëngjesin e sotëm jam njoftuar se është sulmuar me koktej molotovi pastiçeria ‘Sharr’ në Mitrovicën e Veriut. Dënoj ashpër këtë sulm dhe kërkoj nga organet përkatëse në identifikimin sa më të shpejtë të kryesve e këtij akti kriminal dhe sjelljen e tyre para drejtësisë”, ka shkruar Sveçla në facebook.
Zëvendësdrejtori i Policisë për këtë rajon, Veton Elshani nuk e ka përjashtuar mundësin që vizita e ministri të Brendshëm, Xhelal Sveçla të jetë motivi i sulmit. Ditë më parë, ministri i Punëve të Brendshme të Kosovës, Xhelal Sveçla, së bashku me ish-kryetarin e Mitrovicës së Jugut, Agim Bahtiri, kishin qëndruar në pastiçerinë që u bë cak i sulmit me koktej molotovi më 14 korrik. Pronarët e lokalit janë pjesëtarë të komunitetit goran. /Kosovatimes/
