Luftanija e fundit ruse e patrullimit është larguar nga Krimea e aneksuar, tha zëdhënësi i Marinës së Ukrainës, Dmitry Pletenchuk. Sipas tij, anija dhe dy varka shoqëruese janë nisur drejt Novorossiysk.
Pletenchuk tha se Rusia po zhvendos anijet e saj luftarake, nga frika e granatimeve dhe sulmeve me dronë në Krime. Sipas tij, tani në Krime kanë mbetur vetëm nëndetëset, të cilat komanda ruse i mban në një gjendje gjysmë të zhytur në mënyrë që të jenë më pak të cenueshme.
Ai tha gjithashtu se Rusia po përdor në mënyrë aktive Detin Azov, dhe kryesisht portin e Mariupolit, për të eksportuar grurë dhe metal nga territori i okupuar i Ukrainës në portet ruse. Sipas Forcave të Armatosura të Ukrainës, janë tre anije luftarake ruse në Detin Azov.
Krimea e aneksuar kohët e fundit i është nënshtruar shpesh sulmeve me raketa dhe sulmeve me dron. Si rezultat i sulmeve, objektivat ushtarake dhe civile janë dëmtuar dhe ka viktima në mesin e civilëve. Komanda ukrainase, si rregull, nuk komenton sulmin. Megjithatë, përfaqësuesit e Kievit vunë në dukje se Krimea është një zonë lufte dhe banorët duhet të qëndrojnë larg instalimeve ushtarake ruse.
